Ҳукми эъдоми Муҳаммад Мурсӣ ва раҳбари “Ихвонулмуслимин” хонда шуд
Додгоҳи ҷиноии шаҳри Қоҳира ҳукми ниҳоии худ алайҳи Муҳаммад Мурсӣ, раисҷумҳури пешин ва Муҳаммад Бадеъ, раҳбари ҳаракати "Бародарони мусулмон" ё “Ихвонулмуслимин”-и Мисрро эълон кардааст.
Ба иттилои шабакаи телевизионии “ал-Ҷазира”, раисҷумҳури пешини Миср ва Муҳаммад Бадеъ рӯзи 16 июн аз сӯи додгоҳи Қоҳира дар куштори нигаҳбонони зиндон ва фирор аз маҳбас дар соли 2011 айбдор шуда, ба эъдом маҳкум шудаанд. Инчунин ин ду раҳбари аршади ҳаракати Бародарони мусулмон дар пайи баррасии парвандаи баҳсбарангези “ҷосусӣ” ба ҳукми абад маҳкум гардидаанд.
Додгоҳи ҷиноии Қоҳира се узви фаъоли ҳаракати "Бародарони мусулмон" – Хайрат Шотир, Муҳаммад Балтоҷӣ ва Аҳмад Абдулъотиро низ дар ҷосусӣ ба нафъи кишвари дуюм айбдор хонда, маҳкум ба эъдом кардааст. Бар асоси қарори додгоҳ дар робита ба парвандаи "Ҷосусӣ" раҳбарони аршади Ихвонулмуслимин ба ҳамкорӣ бо Ҳизбуллоҳи Лубнон ва ҳаракати Ҳамоси Фаластину ифшои сирри давлатӣ муттаҳам хонда шудаанд.
Ин дар ҳолест, ки қаблан Додгоҳи ҷиноии шаҳри Қоҳира дар пайи баррасии “куштори нигаҳбонони зиндон ва фирор аз маҳбас дар соли 2011” Муҳаммад Мурсӣ ва беш аз 100 ҷонибдорашро ба эъдом маҳкум карда буд. Вале эълони ҳукми ниҳоӣ, ки қарор буд, баъд аз машварат бо муфтии Миср рӯзи 2 июни соли равон эълон шавад, ба имрӯз - 16 июн ба таъхир афтод.
Муҳаммад Мурсӣ, ки баъд аз ҳукумати 32-солаи Ҳуснӣ Муборак дар пайи интихоботи мардумӣ ба курсии раёсати ҷумҳури ин кишвар нишаст, аз мақомаш бо дастури артиши ин кишвар барканор шуд. Мақомоти қудратии Миср баъд аз барканории Мурсӣ, ӯро боздошт ва алайҳаш чандин парвандаҳои ҷиноӣ боз карданд, ки худи Мурсӣ ва пайравонаш онҳоро туҳмат медонанд.
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |