Вазир дар бораи “кашмакаш”-и тоҷикону узбакҳо барои ош ва пешниҳоди “Кохи Наврӯз” ба феҳристи ЮНЕСКО
Шамсидддин Орумбекзода, вазири фарҳанги Тоҷикистон, имрӯз, 20-уми июл зимни нишасти матбуотӣ аз санъати меъмории “Кохи Наврӯз” ва нақшу нигори миллии зебои он тавсиф карда, афзуд, ки азм доранд, шоҳкориҳои Кохи Наврӯз ҳамчун мероси ғайримоддии фарҳангии дунё эътироф карда шаванд.
Вазири фарҳанги Тоҷикистон дар ҳузури хабарнигорони расонаҳои дохилию хориҷӣ дар Душанбе гуфт, "Кохи Наврӯз”, ки мо дорем, ин нигораҳое, ки дар он ҷо нақшгузорӣ шудаанд, дар дунё ҳамто надорад. Мо зимни сафарҳои корӣ ба кохи шоҳони зиёди кишварҳои гуногун рафтаему дидаем. Аммо “Кохи Наврӯз” дар дунё воқеан ҳамто надорад. Бо назардошти ҳамаи ҳамин мо дар назди ЮНЕСКО масъала гузоштем, ки онро ба феҳристи номинатсияҳои ғайримоддӣ дохил кунад. Барои ворид кардани “Кохир Наврӯз” ба мероси фарҳанги моддии таърихӣ камаш он бояд 50 сол фаъолият дошта бошад. Бо назардошти ҳамин, ки “Кохи Наврӯз” дорои нақшу нигори олӣ аст, мо аллакай ин ҳуҷҷатҳоро пешниҳод кардем, мутахассисонро аз ЮНЕСКО даъват кардем, онҳо омада инро мавриди таҳқиқ қарор медиҳанд”.
Дар мавриди оқибатҳои “кашмакаш” барои “Оши палав”, ки ҳам Тоҷикистон ва ҳам Узбакистон онро ба феҳристи мероси умумиҷаҳонии ЮНЕСКО пешниҳод кардаанд, Орумбекзода изҳор дошт, ки ЮНЕСКО метавонад, пешниҳоди ҳар ду ҷонибро қабул кунад. Вазири тоҷик қайд намуд, ки ҳарчанд Узбакистон “Оши палав”-ро пештар пешниҳод кардааст, вале ин муҳим нест ва “Юнеско” метавонад аз номи 2, 10 ва ё 12 кишвар, инро қабул кунад: “Қаблан рӯзноманигорони муҳтарам масъалаи ҷашни чавгонро бардоштанд ки чаро дигарон пешдастӣ кардаанд? Ба наздикӣ дар Ереван дар як сафари корӣ доштам ва ҳамон ҷо як мутаххасиси хеле баландпоя аз Эрон гуфт, “ЮНЕСКО” ташкилотест, ки кишварҳоро ба дӯстӣ меоварад. Ин ҷо муҳим нест, ки аз нигоҳи хронологӣ Шумо пешдастед ё дигар, муҳим нест, ки кӣ пештар пешниҳод кардааст. Муҳим рамзи дӯстӣ аст, мардумро ба ҳам овардан аст. Бояд заминаҳои дӯстияшро ба кор барем. Агар пешниҳоди Узбакистон дар мавриди “Оши палав” қабул шуд, Тоҷикистон бо он ҳамроҳ мешавад, ки мо ҳам дорем. Мисол Наврӯзро, ки Эрон ташаббускор шуд ва мо ҳам шомил астем, Мо ба Конвенсия тағйрот ворид мекунем, ки аввал пешниҳод кардан муҳим набошад”.
Дар ҳамин ҳол ба гуфтаи Орумбекзода Тоҷикистон инчунин “Чакан” ва “Фалак”-ро низ ба рӯйхати мероси ЮНЕСКО пешниҳод намудааст. Қаблан Эмомалӣ Раҳмон дар мулоқот бо зиёиёни кишвар Кохи Наврӯзро тавсиф кард, ки давоми 6 сол сохта шуда, дасти ягон хориҷӣ ба он нарасидааст: “Ин ҷо дасти ягон хориҷӣ нест. Тамоми устоҳои миллӣ аз Рашту Бадахшону Суғд дар ин ҷо ба кор ҷалб шуданд”. Раисиҷумҳур инчунин таъкид намуд, Кохи Наврӯз аз ҳисоби буҷаи давлат сохта нашуда, барои бунёди он соҳибкоронро ҷалб кардааст.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |