09 авг 2016 11:26Тоҷикистон / Сиёсат

Нигаронии Эмомалӣ Раҳмон аз хатари афзун шудани обшавии аз ҳад зиёди пиряхҳо

Эмомалӣ Раҳмон, раисиҷумҳурии Тоҷикистон аз ҷомеи ҷаҳонӣ даъват кардааст, барои ҳалли масоили марбут хатари афзун шудани обшавии аз ҳад зиёди пиряхҳо, баланд шудани сатҳи оби дарёҳо, тағйирёбии иқлими сайёра ва дигар мушкилоти марбут ба об ҳамкорӣ ва муколамаи созандаи байнидавлатиро пеша намоянд.

Ин даъвати Эмомалӣ Раҳмон дар ҷараёни Симпозиуми байналмилалии сатҳи баланд оид ба Ҳадафи шашуми рушди устувор таҳти унвони “Таъмини дастрасии умум ба об ва беҳдошт”, ки имрӯз, 9 август дар Душанбе ба кори худ оғоз кард, сурат гирифтааст. Дафтари матбуоти раисиҷумҳур мегӯяд, президент зимни суханронӣ ба муҳимияти ҳадафи шашуми рушди устувор, ки ба масъалаи таъмин намудани дастрасии ҳамагонӣ ба об ва беҳдошт бахшида шудааст, дахл намуда, таъкид доштааст, ин ҳадаф, дар баробари зарурати таъмин намудани дастрасӣ ба оби ошомиданӣ ва беҳдошт, масъалаҳои сифати об, самаранокии истифодаи он, пиёдасозии мудирияти муштараки захираҳои об, ҳифзи экосистемаи об, инчунин тавсеаи ҳамкорӣ ва ҳамёрӣ дар соҳаи обро дар бар мегирад: “Ба андешаи Президенти Ҷумҳурии Тоҷикистон қисмати марбут ба оби Ҳадафҳои рушди устувор вазифаҳои алоҳидаеро, ки ҳамгироии ҳадафи 6-умро бо дигар Ҳадафҳои рушди устувор таъмин менамоянд, муқаррар карда мудирияти захираҳои об дар Рӯзномаи нави ҷаҳонии рушд ҷойгоҳи калидиро касб намудааст”.

Ба иттилои манбаъ, Эмомалӣ Раҳмон пешниҳод кардааст, зимни баррасии масъалаҳои марбут ба татбиқи Ҳадафи шашуми рушди устувор таъсири манфии тағйирёбии иқлим ба захираҳои об, ки метавонад кӯшишҳои давлатҳоро дар самти расидан ба Ҳадафҳои рушди устувор халалдор намояд, афзоиши шумораи аҳолӣ дар миқёси сайёра ва ниёзмандии рӯзафзун ба захираҳои об, ба инобат гирифтани унсури гендерӣ дар мудирияти захираҳои об ва ҳамкории фаромарзӣ дар соҳаи об ҳамчун як омили калидии таъмини сулҳу субот ва рушд мавриди таваҷҷуҳи доимӣ қарор дода шаванд.Дар суханронии худ Сарвари давлат муҳтарам Эмомалӣ Раҳмон бори дигар аз хатари афзун шудани обшавии аз ҳад зиёди пиряхҳо, баланд шудани сатҳи оби дарёҳо, тағйирёбии иқлими сайёра ва дигар мушкилоти марбут ба об ёдовар шуда аз ҷомеи ҷаҳонӣ даъват ба амал овард, ки барои ҳалли масоили марбут ба ин мушкилот ҳамкорӣ ва муколамаи созандаи байнидавлатиро пеша намоянд.

Дафтари матбуоти Президент мегӯяд, дар кори Симпозиуми байналмилалӣ беш аз 700 намояндаи воломақом аз 90 кишвар, 47 ташкилоти байналмилалӣ ва минтақавӣ, ба монанди СММ ва 17 сохтору ниҳоди зертобеи он, Созмони ҳамкории Шанхай, Иттиҳоди давлатҳои мустақил, Созмони ҳамкории иқтисодӣ, Бонки ҷаҳонӣ, Салиби Сурх ва дигарон иштирок доранд: “Симпозиум намояндагони баланпояи давлату ҳукуматҳо, роҳбарон ва коршиносону мутахассисони ташкилотҳои минтақавӣ ва байналмилалӣ, доираҳои академӣ, илмию соҳибкорӣ, ҳамчунин ҷомеаи шаҳрвандиро, ки дар мавриди истифодаи захираҳои обӣ метавонанд қарор қабул кунанд, ба ҳам овардааст”.

Манбаъ меафзояд, дар Симпозиуми байналмилалӣ, ки то 11 август идома хоҳад кард, мавзӯъҳои рӯзмара, аз ҷумла афзун намудани зарфияти ҳукуматҳои миллӣ ва мақомоти маҳаллӣ дар масъалаи мудирият аз болои истифодаи ҳамгироиёнаи захираҳои обӣ, табодули дониш ва таҷриба дар масоили беҳтар намудани дастрасӣ ба об, беҳдошт ва санитария, баланд бардоштани самаранокии истифодаи об, коҳиш додани ифлосшавии захираҳои обӣ, ҳифзи ҳавзҳои обӣ ва системаҳои беҳдоштии экологӣ, пешбурди ҳамкориҳо ва шарикии байналмиллалӣ, рушди ҳамкориҳои минтақавӣ ва бисёрсоҳа, пешбурди ташаббусҳои мушаххас ҷиҳати иҷрои ҳадафи шашуми рушди устувор ва вазифаҳои вобаста ба он мавриди баррасӣ қарор дода мешавад.

Дар чорчуби доираи Симпозиуми байналмилалӣ ҳамчунин ҷаласаи 4-уми мушовирони махсуси Панели сатҳи баланд оид ба масоили об баргузор гардида дар ҷаласаҳои алоҳидаи ин чорабинӣ масъалаҳои матраҳ намудани ташаббусҳои ҳамкорӣ, аз ҷумла пешниҳод оид ба Даҳсолаи байналмилалии об барои рушди устувор, дастрасии умумӣ ва баробар ба оби ошомидании беҳтар ва арзон, дастрасии умумӣ ва баробар ба василаҳои сазовори санитарӣ-беҳдоштӣ барои ҳама, баланд бардоштани сатҳи самарабахши истифодаи об, таъмини мудирияти кулли захираҳои обӣ, муҳофизат ва барқарорсозии экосистемаҳои обӣ, баланд бардоштани сифати об тавассути коҳиш додани ифлосшавии муҳити зист ва механизмҳои нави иноватсионӣ дар ҷодаи ҳамкориҳо дар доираи об барои рушди устувор баррасӣ мешаванд.

Мӯҳр

Хабарҳои монанд:

мехмон

Гармшавии сайёра ва обшавии яххоро пешгири карда намешавад. Олами хасти ин яхдон ( холодилник ) нест ки ба мо одамони одди итоат кунад!! Он табиате ки Офаридгор ба мо лоик дидааст мебинем. Чи хеле ки яхбандии бузург ва обхезии замони Нухи наби шуда гузашт, гармо низ бояд шавад. Чунки баъди яхбандию обхези тагиротии сеюми чахони ин гармо хаст. Олимон хамаи инро санчида дидаанд. Ду тагироти табиатро хам атеистону олимони дуняви ва хам олимони динхои чахони эътироф мекунанд.

Ҷавоб диҳед Иқтибос Шикоят

Ях

Илтимос намонен яхо об шаван. Мо бе ях чи кор мекнем? Хама таги об мемона

Ҷавоб диҳед Иқтибос Шикоят

Эзоҳ илова кунед