05 сен 2016 11:17Тоҷикистон / Акс

АКС: Ифтитоҳи корхонаи 1 миллиардӣ барои раҳоии “ТАЛКО” аз пойбандӣ ба хориҷа

Эмомалӣ Раҳмон, раисиҷумҳури Тоҷикистон имрӯз, 5-уми сентябр дар ноҳияи Ёвон корхонаи истеҳсоли криолит, алюминийи фтордор ва кислотаи сулфат бо арзиши 990 миллион сомониро ифтитоҳ намуд, ки ба коҳиши вобастагии Ширкати алюминии тоҷик "Талко" аз ашёи хоми воридотӣ равона шудааст.

Тибқи иттилои дафтари матбуоти раисиҷумҳури Тоҷикистон то ҳол криолит, алюминийи фтордор ва кислотаи сулфат, ки маҳсулоти асосӣ дар истеҳсоли алюминий мебошанд, аз кишварҳои назди Балтика, Белорусия, Русия ва Ҷумҳурии Мардумии Чин ба “Талко” ворид мешуданд: “Баробари ба кор шуруъ кардани Корхонаи истеҳсоли криолит, алюминийи фтордор ва кислотаи сулфат Ширкати алюминийи тоҷик аз вобастагӣ ба воридоти ин намуди маҳсулот пурра раҳо ёфта, ба имкониятҳои содиротӣ ноил мешавад. Аллакай як қатор давлатҳои истеҳсолкунандаи алюминий, аз ҷумла, корхонаҳои алюминийи Қазоқистон, Озарбойҷон, Эрон, Ҳиндустон, Аморати Муттаҳидаи Араб, Қатар, Баҳрайн, Федератсияи Русия ва Ҷумҳурии Мардумии Чин барои харидории криолит ва фториди алюминийи Тоҷикистон пешниҳоди ҳамкорӣ намудаанд”.

Эмомалӣ Раҳмон зимни ифтитоҳи корхона гуфт, сохтмони ин се корхона соли 2008 оғоз гардида, моҳи июни соли 2014 Ширкати алюминийи Тоҷик бо Корпоратсияи миллии мошинсозии вазнини Ҷумҳурии Мардумии Чин оид ба анҷоми сохтмону таҷҳизонидани корхонаҳо қарордод ба имзо расонида буд: “Барои бунёду таҷҳизонидани корхонаҳои Ҷамъияти “Криолит” беш аз 990 миллион сомонӣ (баробар ба 126 миллион доллари амрикоӣ), аз ҷумла беш аз 290 миллион сомонӣ аз ҳисоби маблағҳои Ширкати алюминийи Тоҷик сармоягузорӣ карда шудааст”.

Раисиҷумҳури Тоҷикистон таъкид кард, ки маҳсулоти истеҳсолшаванда 80 фоиз барои эҳтиёҷоти Ширкати алюминийи Тоҷик истифода гардида, боқимондаи он содирот карда мешавад.

Манбаъ мегӯяд, сохтмони Корхонаи истеҳсоли криолит, алюминийи фтордор ва кислотаи сулфат марҳилаи якум дар рушди Корпоратсияи кимиёвию металлургии тоҷик мебошад: “Дар корхонаи навбунёд ҳамасола 12 ҳазор тонна криолит,18 ҳазор тонна фториди алюминий ва 130 ҳазор тонна кислотаи сулфат истеҳсол гардида лоиҳаи бунёди он 126 млн доллари ШМА-ро дар бар мегирад.Ҳамчунин дар корхонаи мазкур ба таври иловагӣ таввасути дастгоҳҳои эҳтиётӣ истеҳсоли криолит дар ҳаҷми 18 ҳазор тонна ва фториди алюминий дар ҳаҷми 27 ҳазор тонна пешбинӣ шудааст”.