Баъди ду рӯз исми барандаи курсии Кохи Сафед дақиқ хоҳад шуд. Ин соатҳо дар штатҳои мухталифи Амрико мулоқоту суханронии тарафдорони номзадҳои раёсатҷумҳурӣ доир мегардад.
Соатҳои охири маъракаи таблиғотӣ ҳассос мешавад. Ҳар соат дар шаҳрҳои мухталифи Амрико дидору гуфтугӯи номзадҳо, тарафдоронашон ва аъзои хонаводаи онҳо сурат мегирад. Охири ҳафтаи гузашта Билл Клинтон, ба тарафдории номзадии ҳамсараш хонум Ҳиллари Клинтон дар шаҳрҳои штати Колорадо баромад кард. Дар поёни рӯзи саввуми ноябр бароям хабар доданд, ки фардо дар як қатор шаҳрҳои Колорадо мулокоти Билл Клинтон бо интихобкунандаҳо баргузор хоҳад шуд. Бо шунидани ин хабар ба ҳамкоронам аз рӯзномаи The Gazette гуфтам, мехоҳам дар яке аз ин дидору гуфтугӯи собиқ раисҷумҳури Амрико ширкат дошта бошам. Тақрибан соатхои 17:00 бароям нишонии як вебсойтро фиристоданд, ки барои роҳ ёфтан ба суханронии Билл Клинтон роҳнамоӣ мекард. Шарту талаботи пур карданаш хам хеле содда буд. Ҳар гуруҳро вобаста ба касб ҷудо карда буданд. Бахши расонаҳоро нохун задам. Нахуст, бояд шаҳрро интихоб мекардам, баъдан, ном, насаб, шумораи телефон, емайл ва идораи корӣ. Як банди алоҳида барои дархости техникӣ ҳам буд. Аммо ҳеч ишорае ба сару либос на...
Соатҳои 22:00-и ҳамон рӯз бароям мактуб фиристоданд. Ҷавоб мусбат буд. Субҳ роҳ баромадем. Сокинони Пуэбло ҷамъ омада буданд. Чанд миз барои сабти ном буд. Мизи хабарнигорон алоҳида. Исмамро дар феҳраст пайдо кардам. Ишорае гузоштанду ман ҳам рафтам толор. То шурӯи чорабинӣ ним соати дигар буд. Ҳамкорам садо дод, рафтам. Мири шаҳр омадаст ва бо ҳам шинос шудем. Мири шаҳр ҳамроҳи оилааш буд. Нафаре сар хам намекард ва касе издиҳоми мардумро пароканда наменамуд, то мир роҳат ба ҷояш равад...
Билл Клинтон, раисҷумҳури собиқи Амрико 20 дақиқа дертар вориди толор шуд. Таҷриба ва маҳорати хуби идораи эҳсоси мардумро доштааст. Давоми 35 дақиқа ҷаноби Клинтон бо боварии қотеъ ба сокинони шаҳри Пуэбло муроҷиат мекард. Ваъдаҳои зебояш шуру садои мардумро баланд мекард. Вақте барои суолу ҷавоб ҷудо накарданд. Ҳангоми поён шудан аз пиллаҳо то дари баромад мардум бо Билл Клинтон акс мегирифтанд, селфӣ.
Аз бино берун шудем, онҷо издиҳоми дигаре буд. Тарафдорони Доналд Трамп бо баландгӯяк шиорпартоӣ мекарданд. Аҷоиб! Дар дохил ташвиқоти номзадии хонум Клинтон, берун, суханронии тарафдорони рақибаш -Трамп.
Дар берун эътирозгарон зидди ваъдаҳову барномаи номзадҳо баромад мекарданд. Аммо бо эхтиром ва бо навбат. Овезаҳои “Амрико зидди Трамп”, “Амрико зидди Клинтон”-ро ҳам оташ мезаданд. Дидани ин манзараҳо бароям аҷиб буд. Ба ҳамкорам аз бардоштам гуфтам. Гуфтам, зоҳиран ин гуруҳи эътирозгарон дарсҳои махсус гузаштаанд. Чун бомаҳорат баромад мекунанд. Ҷавоби ҳамкорам маро бештар ба ҳайрат гузошт: “Ба ҳар мусоҳиб бовар накун. Онҳо метавонанд бар зидди номзади хостаашон садо баланд кунанд. Баъзе гуруҳҳо бар ивази маблағ шиорпартоӣ мекунанд”.
Ба дафтари корӣ баргаштем ва ёди чорабиниҳо бо ҳузури мансабдорони тоҷик рафтам. Дар кишвари мо ҳанӯз дастгоҳҳои корӣ дақиқ мекунанд, ки кадом хабарнигор бояд дар чорабинӣ ширкат кунад. Либосро ҳам “мушаххас” мекунанд. Аксар вақт мегӯянд, ки гӯширо бояд нагирем. Тафтиши инсон, дастгоҳ, ҷузвдон. Дар ин маврид мо бо Амрико фарқияти зиёд дорем. Вале, дар як маврид монандиҳоро пайдо кардам. Ин охирҳо дар хиёбонҳои Душанбе гуруҳҳое шиорпаторӣ мекунанд, ки гуфта мешавад маблағгузорӣ шуда бошанд...
Хумайро Бахтиёр, махсус барои “Озодагон”
Колорадо, ИМА
Матлаби мазкур дар доираи барномаи Интихоботи раисҷумҳури ИМА 2016, Маркази байналмиллалӣ барои хабарнигорон (ICFJ) ва бо дастгирии молии ҳукумати ИМА, Маркази матбуоти хориҷӣ ва Сафоратхонаҳои ИМА таҳия гардидааст.