06 фев 2017 10:22Тоҷикистон / Сиёсат / Дидгоҳи хос

Пешниҳоди Президент барои ҷамъи пули Қатару захираҳои Тоҷикистон

Эмомалӣ Раҳмон, раисиҷумҳури Тоҷикистон дар мулоқот бо сармоядорони қатарӣ пешниҳод кардааст, ки захираҳои табиии Тоҷикистон бо имконоти молиявии Қатар ҷамъ гарданд ва ҳар ду кишвар аз ҳамкорӣ манфиат бардоранд.

Тибқи иттилои дафтари матбуоти раисиҷумҳури Тоҷикистон Эмомалӣ Раҳмон изҳор доштаст, ки дар кишвари мо барномаҳои зиёди судовари иқтисодӣ мавриди татбиқ қарор гирифтаанд ва ин амалия ҷалби сармояи бештари хориҷӣ ва технологияи муосирро тақозо дорад.

Раисиҷумҳури Тоҷикистон аз ҷумла бахшҳои истихроҷи сангҳо ва металлҳои қимматбаҳо, металлҳои ранга ва сиёҳ, саноати сабуку хӯрокворӣ, содироти оби нӯшокӣ ва коркарди маҳсулоти кишоварзӣ, бахусус меваю сабзавоти тару тоза ва нахи пахтаро таъкид кардааст.

Эмомалӣ Раҳмон иттилоъ додааст, ки дар Кодекси андози Тоҷикистон барои пешрафти соҳибкорӣ беш аз 240 номгӯи имтиёзу сабукиҳо пешбинӣ гардидаанд: “Қонунгузории ҷорӣ дар самти сармоягузорӣ такмил ёфта, дар баробари таҳкими муқаррарот оид ба кафолати ҳуқуқҳои сармоягузорон, муҳлатҳои имтиёзнок барои сармоягузорон аз 5 то 10 сол зиёд карда шудаанд”.

Ӯ илова намудааст, ки аз татбиқи лоиҳаҳо дар соҳаи энергетика сармоягузорон метавонанд фоидаи зиёди иқтисодӣ бардоранд: “Ин гуфтаҳо, аз ҷумла ба бунёди нерӯгоҳҳои барқи обии миёна ва хурд низ, ки маблағгузории на он қадар зиёдро талаб менамоянд, дахл доранд”.

Феълан Эмомалӣ Раҳмон ҳамроҳи вазири корҳои хориҷӣ, ёрдамчиёнаш оид ба масъалаҳои робитаҳои хориҷӣ ва оид ба кадрҳо, вазирони рушди иқтисод ва савдо, корҳои дохилӣ, тандурустӣ ва ҳифзи иҷтимоии аҳолӣ, маориф ва илм, нақлиёт, раиси Кумитаи давлатии сармоягузорӣ ва идораи амволи давлатӣ, муовини якум ва раиси Бонки миллии Тоҷикистон дар Қатар қарор дорад.

Мӯҳр

Хабарҳои монанд: