09 фев 2017 16:33Тоҷикистон / Тема дня

САҲА ба Тоҷикистон: Озодии баёнро бо баҳонаи терроризм маҳдуд накунед

Созмони амният ва ҳамкорӣ дар Аврупо дар тавсияҳои нави худ барои кишварҳои Осиёи Марказӣ аз ҳукуматҳои ин минтақа хостааст, ки озодии баёнро бо баҳонаи мубориза бо экстремизму терроризм маҳдуд накунанд. САҲА таъкид кардааст, ки давлатҳои узв муваззафанд дар қонунгузории миллӣ мафҳумҳои “терроризм” ва “экстремизм”-ро мувофиқ ба меъёрҳои байналмилалии ҳуқуқи инсон ба таври рӯшан мушаххас намоянд.

Ҳамчунин дар ин тавсияҳо аз ҳукуматҳои Осиёи Марказӣ тақозо шудааст, ки тамоми рӯзноманигорон ва блогнависонеро, ки боздошт шудаанд ё дар маҳбасанд, озод намоянд.

Дар ин санад, ки нусхае аз он дастраси “Озодагон” шуд, тавсияҳои иштирокдорони конфронси “Чолишҳои гуногуни озодии расонаҳо дар Осиёи Марказӣ”, ки 13-14-уми декабри 2016 дар шаҳри Венаи Утриш (Австрия) баргузор шуд, дар 12 банд барои ҳукуматҳои Осиёи Марказӣ ирсол шудааст.

Дафтари САҲА дар умури озодии расонаҳо дар ин санад пешниҳодҳои беш аз 60 журналистро аз кишварҳои Осиёи Марказӣ бо шумули Муғулистон дар тавсияҳои нави худ ҷой додааст.

Аз ҷумла дар муқаддимаи ин санад гуфта мешавад, ки “Ҳаққи ҷомеа ба гирифтани иттилоъ яке аз қисматҳои зарурии ҳуқуқи озодона изҳор кардани ақида мебошад. Давлатҳои узви САҲА бояд эътироф кунанд, ки чун ҷомеа мақомоти иҷроии давлат низ ба иттилоъ ниёзманданд ва дарки дурусте аз мушкилоти доғу муҳиму чун терроризм доранд. Озодона изҳор кардани ақида яке аз шартҳои зарурӣ барои пешгирӣ ва мубориза бо экстремизми хашину ифротгароёнае, ки ба терроризм меоварад, мебошад. Озодии изҳори ақида метавонад нақши ҳалкунандае дар рушди баробарҳуқуқӣ ва муқобила бо адами таҳаммул дошта бошад”.

Дар банди аввали ин тавсияҳо гуфта мешавад, ки “Меъёрҳои мубориза бо терроризм, ки бо маҳдуд кардани озодии андеша ва расонаҳо марбутанд, бояд ба истондортҳои байналмилалӣ, аз ҷумла бо моддаи 19-и Паймони байналмилалии ҳуқуқҳои шаҳрвандӣ ва сиёсӣ мутобиқ бошанд ва мавриди санҷиши дақиқе бо дар назар гирифтани усулҳои қонунмандӣ, зарурат ва таносуб қарор бигиранд”.

Дар банди дигаре гуфта мешавад, ки Дафтари САҲА дар умури озодии расонаҳо бояд ба давлатҳои узв дар мавриди риоят шудани уҳдадориҳояшон дар ростои озодии расонаҳо ҳангоми коркарди ҳимояти қонунии шаҳрвандон аз ҳодисаҳои террористӣ, ёрӣ намояд.

Ҳамчунин дар ин тавсияҳо гуфта шудааст, ки “ҳуқуқи журналистон барои маҳрамона нигоҳ доштани манбаъҳои хабарияшон ҳангоми инъикоси фаъолиятҳои террористӣ бояд ҳифз шавад. Ҳукуматҳо набояд қонунгузории ҷиноӣ ё чораҳои дигари ҳимоят аз амнияти миллиро ба сифати омили муҷози нақзи ҳуқуқи рӯзноманигорон истифода бибаранд”.

Ҳамчунин аз давлатҳои узв тақозо шудааст, ки пойгоҳҳои интренетиеро, ки хушунат ва терроризмро тарғиб намекунанд масдуд нанамоянд.

Дар тавсияҳои нави САҲА ҳамчунин масъалаи тасвиби муоҳидаи Шӯрои Аврупо дар мавриди ҷиноёти интернетӣ, истифодаи расонаҳои интернетӣ барои муқобила бо терроризм, танзими расонаҳо бидуни дахолатҳои сиёсӣ ва иқтисодӣ ва дигар мушкилоти расонаҳо низ ворид шудааст.

Мӯҳр

Хабарҳои монанд: