23 фев 2017 10:50Тоҷикистон / Сиёсат

Таъкиди Президент ба риояи ҳатмии интизом дар артиш

Эмомалӣ Раҳмон, раисиҷумҳури Тоҷикистон мардуми кишварро ба муносибати рӯзи таъсисёбии Артиши миллӣ табрик гуфта, ба низомиён дар адои хизмати софдилонаву садоқатмандона ва иҷрои вазифаю уҳдадориҳои ҳарбӣ тандурустиву пирӯзӣ, сарбаландӣ ва рӯҳи матину иродаи қавӣ орзу намудааст.

Тибқи иттилои дафтари матбуоти раисиҷумҳури Тоҷикистон Эмомалӣ Раҳмон дар маросими ифтитоҳи маркази таълимии қушунҳои сарҳадӣ гуфтааст, “артиши миллии Тоҷикистон, ки бисту чор сол муқаддам дар шароити ниҳоят вазнину мураккаби сиёсиву иҷтимоӣ дар ҳаёти кишвари тозаистиқлоламон таъсис дода шуд, ҳанӯз аз солҳои нахустин аз имтиҳону озмоишҳои шадиди он айём гузашт ва тадриҷан ба нерӯи қудратманди низомӣ, муҳофизи боэътимоди сулҳу субот ва фазои орому осудаи кишвар табдил ёфт”.

Раисиҷумҳури Тоҷикистон зарур хондааст, ки мақомоти ҳифзи ҳуқуқ ва сохторҳои низомии кишвар фаъолияти худро дар самти мубориза бар зидди ҷинояткорӣ, хусусан, ҷиноятҳои муташаккили фаромиллӣ, таъмини суботу амният, волоияти қонун ва тартиботи ҳуқуқӣ ва дар маҷмӯъ таҳкими иқтидори мудофиавии мамлакат тақвият бахшида, ҳар як корманди ин сохтору мақомот вазифаҳои хизматиашро бо масъулияти баланд ва содиқона ба иҷро расонад.

Ӯ аз марзбонҳои тоҷик даъват намуд, ки дар иҷрои вазифаҳои хизматиашон ҳамеша ҳушёру зирак бошанд ва ҳаргиз фаромӯш накунанд, ки фазои орому осудаи имрӯзаи Тоҷикистони соҳибистиқлол бар ивази ҷони садҳо нафар ҷавонмардони бонангу номуси миллат ба даст омадааст.

Эмомалӣ Раҳмон зикр намудааст, ки танҳо дар зарфи солҳои охир барои Қӯшунҳои сарҳадӣ 29 дидбонгоҳу хонаҳои бисёрошёна сохта, ба истифода супорида шудааст ва бунёди боз 28 иншооти дигар идома дорад.

Сарфармондеҳи қувваҳои мусаллаҳ инчунин аз камбудиҳо зикр карда, таъкид намудааст, ки фармондеҳону роҳбарони ҳамаи қисмҳои ҳарбӣ ва воҳидҳои сохтории мақомоти ҳифзи ҳуқуқ вазифадоранд, ки фаъолияти худро дар доираи қонунҳои амалкунанда, амру фармонҳои Президент, қарорҳои Ҳукумати мамлакат ва ойинномаҳои ҳарбӣ тақвият бахшида, ҷиҳати риояи ҳатмии интизоми ҳарбӣ, баланд бардоштан ва такмил додани маҳорату малакаи касбии сарбозону афсарон, омодабошии ҷангӣ, дар ҳолати хуб нигоҳ доштани техникаву таҷҳизоти низомӣ ва таъминоти ақибгоҳ бо маводу маҳсулоти зарурӣ мунтазам чораҷӯӣ намоянд: “Низоми корҳои тарбиявӣ бояд тарзе ба роҳ монда шавад, ки хизматчиёни ҳарбии Қувваҳои Мусаллаҳ бо риояи интизоми қатъӣ ва маҳорату малакаи ҳамаҷонибаи ҳарбӣ тарбият ёфта, дарк намоянд, ки артиш симои миллат ва шарти муҳимтарини пойдории давлат мебошад”.

Мӯҳр

Хабарҳои монанд: