Русский  >>  فارسی  >>  Сешанбе 21 август 2018, 18:26

Ёров: Дар як ҳафта қариб 1000 муҳоҷири тоҷикро депорт карданд

15 март 2017, 08:52

Раҳбари созмони ҳомии ҳуқуқи муҳоҷирони тоҷик -- “Этмос” мегӯяд, тайи як ҳафтаи ахир наздик ба 1000 муҳоҷири тоҷик аз шаҳру вилоятҳои Русия бо ҳар баҳона ихроҷ ва ҷарима шудаанд.

Каримҷон Ёров 14 март дар суҳбат ба “Озодагон” гуфт, кормандони “ОМОН” ва Хадамоти муҳоҷирати Русия дар кӯча, метро ва сохтумонҳои шаҳри Маскав ва Санкт-Петербург муҳоҷирони меҳнатиро дошта, ҷарима мекунанд: “Дар шаҳри Санкт-Петербург барои надоштани муҳлати иқомат муҳоҷиронро ҷарима доранд, дар ҳоле ки чунин муқаррарот вуҷуд надорад. Ҳар рӯз садҳо муҳоҷирро ихроҷ мекунанд”.

Ӯ аз Исмоил Темиров, як муҳоҷири 27-солаи тоҷик мисол овард, ки 4 март ба шаҳри Маскав омадаву 10 март ихроҷ шудааст: “Ин ҷавон тамоми санадҳои лозимро ба пулис нишон додааст, вале онҳо гуфтаанд ҳуҷҷатҳояш қалбакӣ мебошад. Пулис бо баҳонаи ин ки Темиров давоми як сол аз ҳудуди Русия берун набаромадааст, ӯро ихроҷ кардааст”.

Ба қавли ҷаноби Ёров, давоми 2 рӯзи ахир дар кӯчаҳои Русия дар пайи як амалиёти вижа муҳоҷиронро “аз ғалбер”-и пулис мегузаронанд: “Қаблан дар тамоми Русия, бо истиснои Санкт-Петербург қонуни дароз кардани ҳаққи иқомат мавҷуд буд. Дар Питер муҳоҷирон танҳо бо патент кор мекарданд. Ҳоло пулис бо баҳонаи надоштани “регистрация” муҳоҷиронро ҷарима карда истодааст”.

Раҳбари созмони ҳомии ҳуқуқи муҳоҷирони тоҷик -- “Этмос” меафзояд, тамдиди муҳлати ҳаққи иқомат дар сурати доштани патент ғайриқонунӣ мебошад, зеро дар Қонуни федеролии Русия дар ин бора чизе гуфта нашудааст: “Дар он навишта шудааст, ки дар сурати доштани патент дароз кардани муҳлати ҳаққи иқомат даркор нест, лекин кормандони Хадамоти муҳоҷирати Вазорати корҳои дохилаи Русия худсарона чунин қонунро ҷорӣ кардаанд”.

Каримҷон Ёров мегӯяд, баъди тағйири қонун “Дар бораи муҳоҷират” пулиси рус муҳоҷиронро боздошт карда, бидуни ягон далел ҷарима ва ҳуҷҷатҳояшонро ба додгоҳ мефиристад: “Ҳоло ҳамаи ин ба салоҳияти додгоҳ гузошта шуда, додгоҳ ҳамаро ихроҷ карда истодааст. Аз аввали сол баъди тағйир ба қонун танҳо як нафарро дидам, ки ҷарима шудаасту халос, боқимонда ҳам ҷарима ва ҳам ихроҷ шудаанд. Қаблан дар ҳолати қонуншиканӣ кардани муҳоҷир маротибаи аввал ҷарима шуда, бори дуюм ихроҷ мешуд”.

Ба таъкиди Ёров, дар бештари маврид муҳоҷирон аз 5 то 10 ҳазор рубли русӣ ҷарима мешаванд. Ин дар ҳолест, ки Сарвар Бахтӣ, сухангӯӣ Сафорати Тоҷикистон дар Русия ба “Озодагон” гуфт, дар низоми ихроҷкунии муҳоҷирон дигаргуниеро мушоҳида накардаанд.

Дар гузашта оморҳои ғайрирасмӣ теъдоди муҳоҷирони тоҷикро дар Русия беш аз як миллион нафар мегуфтанд. Дар чанд соли ахир дар пайи тағйири қонунҳои марбут ба муҳоҷират ҳазорҳо нафар аз ҳаққи вуруд ба Русия маҳрум шуданд. Мақомоти Тоҷикистон теъдоди онҳоеро, ки ҳаққи вуруд ба Русияро надоранд, 270 ҳазор мегӯянд.

Охирҳои моҳи феврали имсол расонаҳои русӣ хабар доданд, ки Эмомалӣ Раҳмон ва Владимир Путин, раисҷумҳурони Тоҷикистону Русия дар Душанбе ба масъала афви беш аз 100 ҳазор муҳоҷири тоҷик, ки вурудашон ба Русия манъ шудааст, дахл кардаанд. Ба иттилои “Независимая газета”, масъалаи афви муҳоҷирони тоҷикро дар мулоқоти ду раисҷумҳур Эмомалӣ Раҳмон дар миён гузошта ва Владимир Путин гуфтааст, “мо ин масъаларо баррасӣ кардем. Дар умум роҳи ҳалро ёфтем ва бар асоси тавофуқоти бадастомада бо раисиҷумҳури Тоҷикистон кор хоҳем кард”.


Шарҳи худро бинависед:

Ном:*
E-Mail:
Матни шарҳ:
Посух додан
  • Бехруз

  • 15 март 2017 09:59
  • Гуруҳ: Гости
  • Қайд: --
  • Мақом:
  • Шарҳҳо: 0
  • Матлаб: 0
Сар шид акнун. Ин 1000 тарам дар увош куш кнен точикистонда, ку бинем хукумат чи хел мекна халки бекоркати . Хамита бисёр шидай ки чавонои бекор дар точикистон. Ай бекори рузхои охир факат байни хдшон чанг ,одамкши, банкдузди .
Посух додан
  • Беном

  • 15 март 2017 14:14
  • Гуруҳ: Гости
  • Қайд: --
  • Мақом:
  • Шарҳҳо: 0
  • Матлаб: 0
Як чахон ташаккур
Посух додан
  • РТ03

  • 15 март 2017 14:28
  • Гуруҳ: Гости
  • Қайд: --
  • Мақом:
  • Шарҳҳо: 0
  • Матлаб: 0
ИН ваъдаи оқои Путин дигар шуд ку.

Матолиби ҳамсон:


Дар бораи мо

"Озодагон" нахустин хабаргузории хусусии тоҷикист, ки дар бархе аз кишварҳои Шӯравии пешин сабти ном шуда, мақоми минтақаиро касб кардааст. Хабаргузорӣ дар ҳоли ҳозир бо забонҳои тоҷикӣ, русӣ ва ҳуруфи форсӣ хабар нашр мекунад.

Нишонӣ: Душанбе, хиёбони Саъдии Шерозӣ-16;

Телефон: (+992) 50 20 777 88; (44) 600 10 60;

E-mail: ozodagonweb@gmail.com


Разработка и дизайн сайта: «SmartMedia»

Ҳафтанома

Cаҳифаҳои вижа

Мо дар Фейсбук!