10 май 2017 09:36Тоҷикистон / Сиёсат

Э.Раҳмон “Роғун”-ро ҳаёту мамоти миллат ва кафолати зиндагии шоистаи мардум гуфт

Эмомалӣ Раҳмон, раисҷумҳури Тоҷикистон субҳи имрӯз, 10 май барои шиносоӣ бо ҷараёни корҳои сохтмонӣ дар Неругоҳи барқи обии Роғун ба ин шаҳр сафар кардааст.

Дафтари матбуоти Президенти Тоҷикистон мегӯяд, Эмомалӣ Раҳмон бо ҷараёни корҳои сохтмонӣ шинос шуда, бо ҳайати муҳандисону кормандони техникии иншоот мулоқот кардааст: “Эмомалӣ Раҳмон ҳангоми суҳбат бо муҳандисону сохтмончиёни НБО “Роғун” дастур доданд, ки қабл аз ҳама ба сифат ва таъмини бехатарӣ аҳамият зоҳир намоянд, зеро ин “Кохи нур” ҳаёту мамоти миллат ва кафолати зиндагии шоистаи мардуми Тоҷикистон мебошад”.

Манбаъ мегӯяд, ҳаҷми умумии корҳои пешдарғот 2,7 миллион метри мукаабро ташкил медиҳад. Пас аз иваз кардани маҷрои дарё, аз ҷониби ширкати “Салини Импреҷило” бештар аз 2 миллион метри мукааб омехтаи сангу шағалмаводи пешдарғот хобонида шудааст: “Айни ҳол дар як шабонарӯз аз 23 то 26 ҳазор метри мукааб маводи сарбанд ба пешдарғоту дарғоти навбати аввали Неругоҳ рехтаву мустаҳкам карда мешавад”.

Масъулини НБО “Роғун” гуфтаанд, то имрӯз дар сарбанди неругоҳ 47 асбоби санҷишӣ-ченкунӣ васлу насб гардидааст. Лоиҳа ва технологияи сохтмони пешдарғот талаб мекунад, ки дар бунёди он 32 ҳазору 200 метри мураббаъ масолеҳи сохтмони геомембрана, ки дар кишварҳои Аврупо истеҳсол карда мешавад, ворид карда шудааст. “Геомембрана дар қисмати пеши дарғот қисм-қисм ва қабат ба қабат дар якҷоягӣ бо дигар маводҳо ва қабатҳои ҳимоявӣ насб карда мешавад, ки барои нагузаштани об пешбинӣ шудааст. Айни замон корҳои васлу насби геомембрана дар сарбанд идома дошта, то ба имрӯз ба масоҳати зиёда аз 18 ҳазор метри мураббаъ пурра васлу насб гардида, пайваст кардани дарзҳо идома дорад. Хобонидани ин мавод, ки зиддиполоишӣ мебошад, имкон фароҳам меорад, ки оби дохили обанбор аз пешдарғот нагузарад. Дар Тоҷикистон ин таҷрибаи аввал мебошад”,-меафзояд дафтари матбуоти раисҷумҳур.

Ба иттилои манбаъ, баъди шиносоӣ бо ҷараёни корҳо дар қисматҳои алоҳидаи пешдарғоти НБО “Роғун”, Эмомалӣ Раҳмон бо натиҷаи корҳои сохтмонӣ дар нақби нақлиётии-Т22 шиносоӣ пайдо кардааст. Корҳои сохтмонӣ дар нақби нақлиётии Т-22 ба итмом расида, дар маҷмӯъ корҳои нақбканӣ 157 286 м3, дар ҳаҷми 32 865 м3 метри мукааб хобонидани бетони конструктивӣ иҷро гардидааст: “Айни замон кашонидани сангу шағал ба воситаи нақби мазкур барои бунёди пешдарғот идома дорад. Дарозии нақби мазкур дар маҷмӯъ (Т-22, Т-22I ва Т-22II) 600 метри тулонӣ мебошад”.

Ба иттилои расмӣ феълан дар сохтмони НБО “Роғун” бештар аз 13 ҳазор нафар кор мекунанд. Ин неругоҳ дар сурати бунёд бо иқтидори 3600 мегават ва садди 335 метрӣ, бузургтарин неругоҳ дар Осиёи Марказӣ хоҳад шуд ва Тоҷикистонро аз як кишвари муҳтоҷи нерӯи барқ ба содиркунандаи он табдил хоҳад дод.

Мӯҳр

Хабарҳои монанд:

Аз Рогун, Рогуншох

Озодагон ин чи хел маълумотнома хаст, ки дар сайти "ОЗОДИ ХАБАРХО" шумораи кормандонро 14 000 гуфтанду дар сайти Шумо 13000 нафар кадомаш дуруст бошад. Ё ин ки дар ин ГЭС хам изофанависии шумораи кормандон сар шуд чи балое?

Ҷавоб диҳед Иқтибос Шикоят

Абдураҳим

Озодагони муҳтарам Тоҷикистон кишвари муҳтоҷи нерӯи барқ нест .... худоро шукр ки нисбати дигар кишварҳо хело барқи фаровону нисбатан арзон дорем. Танҳо барои беҳшудани вазъи иқтисоди каме дар зимистон норасои ба чашм мехурад ва ин маънои онро надорад ки муҳтоҷ бошад. ана ин кохи нӯр бунёд шавад Худо хоҳад содиротчии рақами як дар О. Марказӣ мешавем......... таъна назанед кишваро

Ҷавоб диҳед Иқтибос Шикоят

ном

Мухтарам ЧО хамту як нохияи Рашт назар мекарден хуб мешуд сел базе хочагихоро хароб кардааст аммо ягон кумак аз хокимияти нохия нест

Ҷавоб диҳед Иқтибос Шикоят

Ворух

Зинда бош Ҷаноб!

Ҷавоб диҳед Иқтибос Шикоят

Эзоҳ илова кунед