29 май 2017 10:50Тоҷикистон / Сиёсат

Генерал Раҳмоналӣ вазъи марз бо Чинро муайяну бо Афғонистонро мураккаб хонд

Генерал Раҷабалӣ Раҳмоналӣ, фармондеҳи Қӯшунҳои сарҳадии Кумитаи давлатии амнияти миллии Тоҷикистон, мегӯяд марз бо Чин аломатгузорӣ шудааст, аммо вазъ дар он тарафи дарёи Панҷ мураккаб мебошад.

Марзбони № 1-и Тоҷикистон зимни мусоҳиба бо Мавҷуда Анварӣ, хабарнигори “Ховар” дар мавриди ҳамкорӣ бо марзбонҳои кишварҳои ҳамсоя изҳор доштааст, ки марз бо Чин аломатгузорӣ шудааст: “Дар ин муддат аз ҷониби марзбонони тоҷик аломатгузории марзи Тоҷикистону Хитой гузаронда шуд. Бо назардошти хусусиятҳои релефи маҳаллӣ қисми зиёди сарҳади давлатии Тоҷикистону Афғонистон бо системаи огоҳкунӣ муҷаҳҳаз гардонда шуд. Ҳоло дар ҳудуди ҷумҳурӣ 34 нуқтаи назоратии гузаргоҳи сарҳадӣ мавҷуд аст, ки 25 адади он мақоми байналмилалӣ дорад. Аз вақти зери назорати Қӯшунҳои сарҳадӣ гузаштани сарҳади Тоҷикистону Афғонистон аз моҳи июли соли 2005, сарҳадбонони тоҷик дар фаъолияти хизматӣ-ҷангии ҳифзи сарҳади Ҷумҳурии Тоҷикистон ба натиҷаҳои назаррас ноил гардиданд. Ҳамкорӣ бо ҳамкасбони афғон, қирғиз, ӯзбек ва хитоӣ дар сатҳи зарурӣ ба роҳ монда шудааст. Бо мақсади роҳ надодан ба фаъолияти ғайриқонунӣ дар сарҳад ва баланд бардоштани самаранокии ҳифзи сарҳади давлатӣ дар байни сарҳадбонони кишварҳои ҳаммарз доимо вохӯриҳои намояндагии сарҳадии гуногунсатҳ гузаронида мешаванд”.

Дар мавриди сарҳад бо Афғонистон Раҷабалӣ Раҳмоналӣ изҳор доштааст, ки сарҳади давлатӣ дар минтақаи Тоҷикистону Афғонистон дарозтарин мебошад: “Бо сабаби мухолифати қувваҳои давлатии ҶИА бо толибон, ҷангиёни «Ҳаракати исломӣ», «Ҷамоат-Ансоруллоҳ», «Ҳаракати исломии Туркистон», «Ал-Қоида» ва дигар гурӯҳҳо, вазъият дар ин кишвари ҳамсарҳад мурракаб мебошад. Ҳамаи ин ба вазъи сарҳади мо бо Афгонистон бетаъсир монда наметавонад”.

Ба гуфтаи ӯ яке аз таҳдидҳои асосӣ дар минтақаи сарҳадии Тоҷикистону Афғонистон ин афзоиш ёфтани қочоқи маводи мухаддир мебошад, чунки даромад аз фурӯши моддаҳои нашъадор яке аз сарчашмаҳои асосии даромади гурӯҳҳои террористӣ дар ҳудуди Афғонистон ба ҳисоб меравад: “Вазъияти ҳозира дар сарҳад, бо дарназардошти вазъи ҳарбӣ-сиёсии Афғонистон, махсусан баъди баровардани қувваҳои Иттиҳоди Атлантикаи шимолӣ масъулияти зиёдтарро талаб менамояд. Дар айни ҳол Қӯшунҳои сарҳадии Тоҷикистон асосан бо афсарони дорои маълумоти олии ҳарбӣ пурра гардонида шуда, қодиранд, ки бехатарӣ ва суботи сарҳадро таъмин намоянд”.

Дар охири мусоҳиба Раҷабалӣ Раҳмоналӣ марзбонони тоҷикро бо иди касбиашон, ки ҳамасола 28-уми май таҷлил мешавад, шодбош гуфта, афзудааст, “ба ҳар як шаҳрванде, ки таҳти парчами давлати соҳибистиқлоламон суботу оромии кишвар, марзу буми сарзамини аҷдодӣ ва амнияти давлату ҷомеаро таъмин мекунад, саломативу сарбаландӣ, рӯзгори обод ва ҳисси баланди ватандӯстиву ватанпарварӣ орзу менамоям”.

Мӯҳр

Хабарҳои монанд: