Бахшҳо
14 июн 2017 10:22Ҳуқуқи инсон

Як узви “Ҳизби исломии Туркистон” барои 5 сол аз озодӣ маҳрум шуд

Суди вилояти Хатлон як сокини 26-солаи деҳаи Қизилнишони ноҳияи Қубодиёнро бо иттиҳоми узвият дар “Ҳизби исломии Туркистон”, ташкилоти фаъолияташ мамнӯъ дар Тоҷикистон, барои 5 сол аз озодӣ маҳрум кард.

Отабек Алимов дар содир намудани ҷинояти дар моддаи 187, қисми 2-и Кодекси ҷиноятӣ пешбинигардида, яъне “иштирок дар иттиҳоди ҷиноятӣ (ташкилоти ҷиноятӣ) ё иттиҳоди ташкилотчиён, роҳбарон ва ё дигар намояндагони гурӯҳҳои муташаккил” гунаҳкор дониста шуда, тӯли 5 соли оянда дар колонияҳои ислоҳии низомаш пурзӯр нигоҳ дошта мешавад.

Ҳукми суди вилояти Хатлон баъд аз зуҳри 7 июн эълон гардид ва ҳанӯз қувваи қонунӣ нагирифтааст. Раисикунандаи мурофиа Сайфиддин Муҳиддинзода таъкид кард, ки Отабек Алимов ва ҳимоятгаронаш метавонанд давоми 10 рӯз аз ҳукм ба Суди Олии Ҷумҳурии Тоҷикистон шикоят ё эътироз оваранд.

Як узви “Ҳизби исломии Туркистон” барои 5 сол аз озодӣ маҳрум шудБа қавли С. Муҳиддинзода, маҷлиси кушодаи судӣ муайян кардааст, ки Алимов Отабек Сайфуллоевич ҳанӯз дар солҳои 2010-2011 бо ҳамсинфаш Суннатулло Нуриддинов дар телефони мобилӣ наворҳои ҷангиён ва саркардаҳои “Ҳизби исломии Туркистон” (собиқ “Ҳаракати исломии Ӯзбекистон”, ки фаъолияташ бо ҳалномаи Суди Олии Ҷумҳурии Тоҷикистон аз 30 марти соли 2006 ҳамчун ташкилоти террористиву экстремистӣ манъ карда шудааст)-ро насб ва тамошо намуда, қарор додаанд, ки рафта дар сафи ташкилоти мазкур бар зидди “кофирон” “ҷиҳод” мекунанд. Сарфи назар аз ин ки Отабек он замон дар курси дуюми факултаи иқтисодии Донишгоҳи давлатии Қӯрғонтеппа ба номи Носири Хусрав таҳсил мекард, зери таъсири ҳамдеҳагонаш Юнусжон Саидов ва Суннатулло Нуриддинов тарки донишгоҳ намуда, пинҳонӣ аз аҳли хонавода бо баҳонаи муҳоҷирати меҳнатӣ моҳи июли соли 2011 аз фурудгоҳи Душанбе ба Маскав парвоз кардааст.

- Тавре ки дар мурофиаи судӣ маълум гардид, - гуфт судя С. Муҳиддинзода, - дар Россия Саломов Илҳомжон Абдуназарович ном марди ӯзбектаборе пайрав ва таблиғгари “Ҳизби исломии Туркистон” (“Ҳаракати исломии Ӯзбекистон”) буда, ҳамроҳи чанд нафари дигар ҷалб кардани ҷавонони бетаҷрибаро аз деҳаи Қизилнишони ноҳияи Қубодиён, ки аксаран ӯзбекзабонанд, ба сафи ин ташкилоти террористию экстремистӣ эътирофшуда дар нақша доштаанд. Дар Маскав Отабек ва Суннатуллои он вақт 20-сола аз ҷониби Илҳомжон, Аҳман (шаҳрванди Ӯзбекистон) ва Ҳузайфа (шаҳрванди Қирғизистон) ном шахсон тавассути наворҳои видеоии марбут ба аъзо ва тарафдорони “Ҳаракати исломии Ӯзбекистон” мағзшӯӣ мешудаанд.

- Ба Ҷумҳурии исломии Афғонистон рафта, бар зидди ҳукумати қонунии ин кишвар мубориза бурдан даркор аст, - иброз медоштанд истихдомгарон. – Шумо агар дар сафи ин ташкилот “ҷиҳод”-ро амалӣ намуда, одам кушед ва дар ин роҳ кушта шавед, ҳатман вориди ҷаннат хоҳед шуд...

Пас аз як моҳ визаи Отабек тайёр шуда, ӯ ҳамроҳи се шаҳрванди Тоҷикистон ва се шаҳрванди Ӯзбекистон ба воситаи машинаи боркаши тамғаи “Автобус” аз Маскав ба Бокуи Озайрбойҷон раҳсипор шуд. Он ҷо се рӯз дар меҳмонхона будубош карда, пасон ба Зоҳидони Эрон ва аз он ҷо ба минтақаи Шактуи вилояти Вазиристони Покистон, ки пойгоҳи низомии “Ҳизби исломии Туркистон” мебошад сафар намуданд.

Дар Покистон Отабеку ёронаш ба Усмон ном амири ҳизби номбурда қасам ёд карда, шомили ин созмони ифротию террористӣ гардиданд. То моҳи майи соли 2013, яъне тақрибан ду сол дар асоси барномаи “Ҳизби исломии Туркистон” он ҷо таълимоти ҳарбӣ гирифта, якҷо бо дигар аъзои ин иттиҳоди ҷиноятӣ пойгоҳи низомии “ҲИТ”, воқеъ дар минтақаи Шактуи Вазиристони Покистонрро ҳимоя кардааст. Дар он он Отабек инчунин истифодаи намудҳои гуногуни силоҳу воситаҳои тарканда ва дигар фаъолияти дорои хусусияти террористию экстремистиро омӯхт.

Дар маводҳои парвандаи ҷиноятии Отабек Алимов омадааст, ки ӯ дар Ҷумҳурии исломии Покистон тибқи 7 моддаи қонуни ҷиноятии он кишвар маҳкум ба зиндон гардида, 2 марти соли 2017 бо ҳукми суд сафед ва озод карда шудааст. Баъди озод шудан Отабек кӯшиши ба Тоҷикистон баргаштанро карда, бо мусоидати сафоратхонаҳои Тоҷикистон дар Покистон ва Афғонистон ба ватан баргаштааст.



Сайфиддин Муҳиддинзода, раисикунандаи мурофиаи мазкур, гуфт, ки раводиди моддаи 187, қисми 2-и Кодекси ҷиноятии Тоҷикистон ҷазои маҳрум сохтан аз озодиро ба муҳлати аз 8 то 12 сол пешбинӣ кардааст. Аммо коллегияи судӣ ҳангоми таъйин кардани ҷазо ҳолатҳои сабуккунандаи ҷазо, яъне ба гуноҳаш иқрор кардан, сидқан пушаймон будан, дар ошкорсозии ҷиноят фаъолона мусоидат намудан, кӯшиши ба ҳаёти осоишта баргаштан, ҷавонӣ ва мусбат тавсиф шудани Отабекро ба инобат гирифта, ба ӯ ҷазои аз ҳадди поёнии дар моддаи 187, қисми 2-и КҶ ҶТ пешбинишуда камтарро муносиб донист.

Як узви “Ҳизби исломии Туркистон” барои 5 сол аз озодӣ маҳрум шудДар ҳамин ҳол, Улуғбек Алимов, бародари калонии Отабек, пас аз эълони ҳукм дар суҳбат бо рӯзномаи “Хатлон” гуфт, интизори ҷазои сабуктар ба додараш буд, зеро вай ихтиёран ба Тоҷикистон баргашта ва азми пешбурди ҳаёти мулкиро дошт. “Дақиқан намедонам, ки дар Покистон чӣ ҷинояте содир кардааст. Ӯро баъди аз маҳбаси Покистон раҳо шуданаш модарам таъкид намуд, ки ба сафорати Тоҷикистон муроҷиат карда, ба ватан баргардад. Дар мурофиаи судӣ сидқан изҳори пушаймонӣ намуд”, - зикр кард Улуғбек.




Аз Улуғбек пурсидем, ки бародараш бо чӣ мақсаде ба Покистон сафар карда буд. Вай дар ҷавоб гуфт: “Ӯ фиреб хӯрдааст. Ба гапи ҳамсинфонаш даромада, гумроҳ шудааст. Бо Отабек имкони суҳбати зиёд надоштам, ки батафсил пурсамаш. Тахмин мекунам, ки ӯро бо роҳи сеҳру ҷоду ҷалб намудаанд. Зеро вай дар гузашта бачаи бисёр мазҳабӣ набуд, медонам, ки машрубот менӯшид”.

Заррагул Раҳимова, вакили мудофеи ҳуқуқи Отабек Алимов, зикр кард, ки ҳукми суд алайҳи зерҳимояташ хеле сабук аст. “Аммо агар нафари таҳти ҳимояи мо шикоят ё эътирозе дошта бошад, мо ҳатман ба суди зинаи болоӣ барои бозбинии ҳукм муроҷиат мекунем. Ин тасмимро бояд худи маҳкумшуда бигирад”, - афзуд З. Раҳимова.




Қобили зикр аст, ки тайи чанд соли охир шумораи зиёди ҷавонон аз ноҳияи Қубодиён ба гурӯҳҳои тундрави террористӣ пайвастаанд. Деҳаи Қизилнишон, ҳозира Навбаҳор, як деҳаи ӯзбекнишини Қубодиён аст ва танҳо дар солҳои 2008-2012 беш аз 30 сокини ҷавон аз ин маҳал бо иттиҳоми ҳамдастӣ бо “Ҳаракати исломии Ӯзбекистон” боздошт шудаанд.

Як узви “Ҳизби исломии Туркистон” барои 5 сол аз озодӣ маҳрум шудМақомоти вилояти Хатлонро гароиши ҷавонон, бахусус аз деҳотҷой, ба ҳизбу ҳаракатҳои ифротию террористӣ шадидан нигарон кардааст. Дар ин росто ноҳияи Қубодиён аз маҳалҳои осебпазир ба ҳисоб меравад. Раиси вилояти Хатлон Давлатшоҳ Гулмаҳмадзода дар яке аз мулоқотҳои ахираш бо сокинони ин ноҳия дар робита ба он изҳори ташвиш кард, ки аз деҳаҳои Навбаҳору Қизилнишон 74 сокини маҳаллӣ, аз ҷумла 14 ноболиғ, ба Сурия рафтаанд. «Се нафари онҳо дар он ҷангҳо кушта шудаанд. Волидон, фаъолони ҷомеа, имомони масоҷид, масъулони ҷамоатҳо, шуъбаҳои кор бо ҷавонон, занон бояд бо мардуми маҳаллӣ бештар вохӯранд, ба онҳо даҳшатҳои ҷанг ва оқибатҳои бадгувори онро шарҳ диҳанд, ба онҳо фаҳмонанд, ки кулли озодиҳо дар Тоҷикистони мо таъмин аст. Ба ҷавонон мафҳуми ватану ватандорӣ, худшиносии миллӣ ва садоқат ба халқу давлатро бояд талқин намоем», - афзуд Д. Гулмаҳмадзода.

Бояд гуфт, ки Суди вилояти Хатлон танҳо дар панҷ моҳи гузаштаи соли 2017-ум 28 парвандаи ҷиноятиро алайҳи 30 нафар ба баррасӣ гирифтааст, ки онҳо дар пайравӣ ва узвият дар ҳизбу ҳаракатҳои экстремистию террористӣ гумонбар дониста шуданд.

Носирҷон МАЪМУРЗОДА,
Комрони БАХТИЁР


Ин гузориш дар ҳамдастӣ бо Намояндагии Институти инъикоси ҷанг ва сулҳ (IWPR) дар Тоҷикистон, дар доираи лоиҳаи “Тавонмандсозии ҷомеа ба хотири мубориза бо ифротгароӣ дар Тоҷикистон” омода шудааст.

Бознашр аз https://khatlon-ruznoma.tj
Мӯҳр
Эзоҳ илова кунед
Номи шумо:
Почтаи электронии шумо:
  • bowtiesmilelaughingblushsmileyrelaxedsmirk
    heart_eyeskissing_heartkissing_closed_eyesflushedrelievedsatisfiedgrin
    winkstuck_out_tongue_winking_eyestuck_out_tongue_closed_eyesgrinningkissingstuck_out_tonguesleeping
    worriedfrowninganguishedopen_mouthgrimacingconfusedhushed
    expressionlessunamusedsweat_smilesweatdisappointed_relievedwearypensive
    disappointedconfoundedfearfulcold_sweatperseverecrysob
    joyastonishedscreamtired_faceangryragetriumph
    sleepyyummasksunglassesdizzy_faceimpsmiling_imp
    neutral_faceno_mouthinnocent
ХАБАРҲОИ ОХИРИН
Баҳси пурзӯр кардани ҳифзи сарҳади Тоҷикистону Афғонистон дар дидори Э.Раҳмон ва ҳайати парлумони Аврупо10:09Оғози фурӯши смартфонҳои iPhone 8 ва iPhone 8 Plus!09:49БО ЗАБОНИ ШЕЪР: Ман зи андешаи турконаи як ҳамватанам метарсам...15:34Чаро ҳукумат ҳамеша ба ТАЛКО имтиёз медиҳад?14:16“Шантаж”-и ҳамсар: Аз ҳаққи модарӣ даст накашӣ расвоят мекунам10:27Баҳси буҷа: Аз қарзи маош то қарзи хориҷӣ11:57Сарвазири Тоҷикистон бо Президенти Узбакистон мулоқот мекунад11:05Ҳимояти СММ аз cарбози тоҷики пайрави “Шоҳидони Яҳво”, ки либоси низомиро рад кард10:38АКС+ВИДЕО. Нахустин анҷумани маъюбони Тоҷикистон дар Душанбе11:51Маҷлис: Аз тағйироти кадрӣ то ваъдаи 80 мансабдор барои пулдиҳӣ аз кисаи худ15:46100 метр дуртар: Тамокукашӣ маҳдудтар шуд13:21Аз парвандаи Маҳмудов то муроҷиати ҷабрдидагони "7 бурҷ": Роҳкиро надорем (ВИДЕО)11:18Пешниҳоди журналисти тоҷик ба раҳбарони кишварҳои ҷаҳон: 2018-ро соли беяроқӣ эълон кунем!09:33Агентии зидди коррупсия гуфт, “Умед-88” ва Вазорати молия аз “Роғун” қарз гирифтаанд08:01Таърихи имрӯз: Мавлуд, ҷашн, санаҳои таърихӣ, дамои ҳаво, бозори арз07:44
ТАҚВИМ
«    Март 2024    »
ДушСешЧорПанҶумШанЯкш
 123
45678910
11121314151617
18192021222324
25262728293031
БОЙГОНӢ
Ноябр 2017 (5)
Октябр 2017 (192)
Сентябр 2017 (257)
Август 2017 (314)
Июл 2017 (301)
Июн 2017 (269)