30 июн 2017 10:51Тоҷикистон / Сиёсат / Рӯ ба рӯ / Тема дня

Барканории сардори Шӯъбае, ки лейтинанти калон Марям Шарифзода кор мекард

Сардори Шӯъбаи маркази иттилоотии қисми минтақаии РКД дар вилояти Хатлон аз вазифа барканор шудааст. Қаблан, дар бораи аз вазифа сабукдуш шудани як корманди дигари ин шӯъба -- лейтинанти калон Марям Шарифзода хабар расида буд. Хонум Шарифзода нафарест, ки шаби 16 майи соли равон дар атрофи манзили зисташ мавриди ҳамлаи афроди номаълум қарор гирифта буд.

Як манбаъ аз Раёсати корҳои дохилии вилояти Хатлон ба “Озодагон” гуфт, майор Сафаров ҳанӯз замони дар беморхона қарор доштани Марям Шарифзода аз кор озод шуда буд. Ӯ далели барканории Сафаровро “бемасъулиятии зердасташ” унвон кард. Худи майор дар як тамоси телефонӣ тасдиқ кард, ки аз вазифа сабукдуш гардидааст, аммо аз шарҳи бештар худдорӣ намуд.

Лейтинанти калон Марям Шарифзода 17 май вақте дар беморхона қарор дошт, ба “Озодагон” гуфта буд, тахминан соатҳои 20:30-и шаби 16 май замоне, ки барои пур кардани тавозуни телефонаш аз хона, воқеъ дар хиёбони Исмоили Сомонӣ берун шуд, мавриди латту кӯб қарор гирифт. Ба иттилои вай, нахуст бо мушт ба шикамаш заданд. Ӯ аз ҳамлавар як марди қоматбаланд ва бо риши миёна тавсиф кард ва гуфт, вақте баланд фарёд зад, вай ва ҳамроҳи дигараш фирор карданд. Табибони Маркази ёрии таъҷилии шаҳри Кӯлоб он замон ба “Озодагон” гуфтанд, дар ӯ осеби пушидаи девораи пеши шикам, латхӯрии бофтаҳои пеши шикам, харошаҳои сеяки мобайни оринҷи дасти чап ва латхӯрии соқи пойи чапро сабт кардаанд.

Аммо ахиран хабари аз вазифа барканор шудани ӯ расонаӣ шуд. Умарҷони Эмомалӣ, сухангӯи Вазорати умури дохилии Тоҷикистон 13 июн дар суҳбат бо “Озодагон” далели барканории хонум Шарифзодаро “вайрон кардани интизомӣ хизматӣ” гуфт. Ӯ шарҳ надод, ки лейтинанти 24-сола кай ва чӣ гуна интизоми хизматиро нақз кардааст, аммо афзуд, ҳоло додситонӣ дар ин робита санҷиш мегузаронад.

Мӯҳр

Хабарҳои монанд: