Раёсати “Бозори Деҳқон”: Нотинҷӣ дар Кундуз картошкаро қимат кард...
Раёсати бозори “Деҳқон”, калонтарин таъминкунандаи Душанбе бо маҳсулоти кишоварзӣ камҳосилӣ ва нотинҷӣ дар Кундузро далели гаронии картошка-“нони дуюм”-и мардуми Тоҷикистон хонда, боз ҳам боло рафтани нархи онро аз эҳтимол дур намедонад.
Мастон Шарипов, муовини раиси бозори “Деҳқон” имрӯз, 6 июл дар суҳбат ба “Озодагон” гуфт, нархи як кило картошка, ки қаблан аз ҳадди 5 сомонӣ гузашта буд, феълан аз 3,5 то 4,5 сомонӣ нарх дорад: “Тобистони соли гузашта, маҳз ҳамин рӯз, 6 июл арзиши як кило картошка 1 сомониву 30 дирамро ташкил медод”.
Масуълини бозори “Деҳқон” далели гаронии картошкаро камҳосилӣ дар Тоҷикистон ва коҳиши воридот аз Покистон арзёбӣ карданд. Ба гуфтаи Мастон Шарипов нотинҷӣ дар вилояти Кундуз боиси коҳиши воридоти картошка аз Покистон шудааст: “Як моҳ пеш ҳамагӣ 3 мошин картошка ворид шуд, ҳоло картошка танҳо аз дохили кишвар мебошад”.
Ноиби раиси бозори “Деҳқон” афзуд, ки феълан минтақаи Қӯрғонтеппа таъминкунандаи пойтахт бо картошка мебошад: “Айни ҳол пешниҳоди картошка аз ин минтақа дар ҳоли анҷомёбист. Пас аз ин ноҳияҳои тобеи кишвар маҳсулоти худро ба фурӯш мебароранд. Агар кишти ноҳияҳои тобеъ низ ба мисли Қӯрғонтеппа бошад, арзиши картошка боло мераваду поин не. Дигар ягон манбаи воридот нест. Интизор мешавем ноҳияи Рашт, Мастчоҳ, Ғончӣ ва Истаравшанро...”.
Ба гуфтаи ноиби раиси “Деҳқон” дар бозори мазкур нозири махсус нархҳоро назорат мекунад: “Баъди харид аз деҳқон савдогар метавонад ба нархи маҳсулот то 15 фисад иловапулӣ зам кунад. Аз ин 3 фоизашро барои хӯрока, либос, чек ва хизмати коммуналӣ сарф карда, 10-15 дирами боқимондаашро фурӯшанда метавонад дар рӯзгораш истифода барад”.
Дар мавриди онҳое, ки нархро худсарона боло мебаранд, Шарипов гуфт, дар ин сурат масуълини бозор маҳсулоти ӯро гирифта, ба хонаи бепарасторон медиҳанд: “Мо аз он ҷо мактуб оварда, нусха карда, яктоашро дар худ гузошта, дигариро ба соҳиби мол месупорем. Чеки бозор барои як метр аз 1,50 то 2,50 сомониро ташкил медиҳад”.
Шаҳрия, як фурӯшандаи бозори “Деҳқон” 6 июл дар суҳбат ба “Озодагон” гуфт, имрӯз як килло картошкаро аз 4 то 5 сомонӣ мефурӯшад: “Мо як кило картошкаро аз деҳқон аз 3,60 то 3,80 сомонӣ мехарем, ки соли қаблӣ килои картошкаро ба мо деҳқон 1,30 то 1,50 сомонӣ мефурухт”.
Далер, деҳқоне аз шаҳри Ваҳдат мегӯяд, майдонҳои кишти картошка соли равон ҳосили кам доданд: “Аз 20 ҳисса ҳамагӣ 15 халта картошка гирифтем. Соли гузашта наздики 40 халта картошка гирифта будам”.
Ин дар ҳолест, ки гаронии нархи картошка сокинони пойтахтро нигарон кардааст. Шаҳрванд Салимшо Зубайдов мегӯяд, мардум тавони хариди гӯштро надоранд ва аксаран аз картошка истифода мебаранд: “Ба таври мисол ман дар як ҳафта то 10 кило картошка ҳам харидорӣ мекунам, ки ин бароям хеле гарон мебошад. Илова бар ин дар ҷое кори доимӣ надорам”.
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |