27 июл 2017 09:32Тоҷикистон / Иҷтимоӣ / Тема дня

4 мудири мактаб дар пайи худкушии хонандаҳо аз вазифа сабукдуш шудаанд (САДО)

Дар нимсоли аввали соли равон чаҳор директори муассисаҳои таълимии вилояти Суғд аз вазифа озод шудаанд.

Осим Каримзода, сардори Раёсати маорифи вилоят аснои суҳбат бо хабарнигорон дар як нишасти хабарӣ гуфт, дар ин давра директорони муассисаҳои таълимии №25-и шаҳри Конибодом, №2-и ноҳияи Мастчоҳ ва №7-у №18-и шаҳри Панҷакент аз мақом барканор шуданд. Ӯ далели барканории мудирони мактабҳоро “бинобар суст ба роҳ мондани корҳои тарбиявӣ, самаранок ташкил накардани ҳамкорӣ бо волидайн дар иҷрои уҳдадориҳои муайяннамудаи қонун “Дар бораи масъулияти падару модар дар таълиму тарбияи фарзанд” унвон кард. Яке аз дигар сабабҳо “бинобар даст ба худкушӣ ва суйикасд ба он аз сӯи хонандаҳо” гуфта мешавад.

Бино ба иттилои Раёсати маорифи вилояти Суғд, тайи 6 моҳи соли ҷорӣ аз ҷониби 24 ноболиғ ҳодисаи худкушӣ ва сўйиқасд ба он ба қайд гирифта шудааст. Ин шумора 22 нафар хонандаҳои таҳсилоти умумӣ будаанд. Ба гуфтаи Осим Каримзода, "ин ҳодисаҳо дар шаҳру навоҳии Конибодом – 2 адад, Хуҷанд – 1, Истаравшан – 2, Панҷакент – 8, Мастчоҳ – 4, Зафаробод – 2 адад ва Ҷаббор Расулов, Исфара, Истиқлол – 1-ададӣ ба қайд расидааст, ки ин ҳодисаҳо нисбат ба ҳамин давраи соли 2016, 5 адад зиёд мебошад”.

Дар зимн ба гуфтаи сардори Раёсати маорифи Суғд, директорони муассисаи таҳсилоти миёнаи умумии №5 ва №6-и ноҳияи Зафаробод, №8-и шаҳри Исфара, гимназияи №1-и шаҳри Конибодом, №40-и шаҳри Панҷакент “танбеҳ” гирифта, мудирони муассисаҳои таълимии №6, №25-и шаҳри Истаравшан, №6-и шаҳри Истиқлол ва №12-и шаҳри Панҷакент “сарзаниш” шудаанд.

Мӯҳр

Хабарҳои монанд: