Дар Тоҷикистон давоми як моҳи охир нархи тухм 10 фоиз арзон шуда, то ба 70 – 75 дирам барои як дона поён омадаст.
Дар ин бора ба хабаргузории Озодагон аз Вазорати рушди иқтисод ва савдои Тоҷикистон хабар доданд. Ба иттилои манбаъ бо вуҷуди арзонишавӣ дар муқоиса бо моҳи апрели соли 2011, он 12,5 фоиз қимматтар аст. Коршиносони тоҷик сабаби асосии арзоншавии тухмро ба фарорасии гармӣ, ки одатан истеъмоли тухм кам мешавад, рабт медиҳанд. Инчунин дар гармӣ мурғҳои хонагӣ тухми бештар мекунанд, ки дар натиҷа талабот ба тухм кам шуда, нархи он коҳиш ёфтаст.
Дар Тоҷикистон тибқи иттилои вазорати кишоварзӣ, таи моҳҳои январ - март 44 миллион дона тухм истеҳсол шудаст, ки дар муқоиса бо ҳамин давраи соли гузашта 7,5 миллион дона бештар аст.
Масъулини вазорати кишоварзӣ изҳор медоранд, ки истеҳсоли тухми ватанӣ, воридоти ин намуди маҳсулотро аз хориҷа ба маротиб кам кардаст. Қаблан, тухм ба Тоҷикистон асосан аз Эрон, Покистон, Ҳиндустон ва Чину Русия ворид мешуд.
Мӯҳр