Варзишгари тоҷик ғолиби сабқати кушодаи умумирусиягӣ оид ба дзюдо миёни ҷавонон гардид.
Тибқи иттилои Федератсияи гӯштини дзюдои Тоҷикистон, ин мусобиқа ба хотираи Григорий Веричев, қаҳрамони ҷаҳон ва Аврупо, барандаи медали биринҷии Бозиҳои олимпӣ, бо ширкати варзишгарони синнашон то 23-сола аз Русия, Қазоқистон ва Тоҷикистон дар шаҳри Челябинск баргузор шуд. Комроншоҳи Устоприён дар рақобатҳо дар вазни то 90 кг дар ҳамаи панҷ қувваозмоӣ бар рақибонаш пирӯзӣ ба даст овард ва мақоми аввалро касб кард.
Ҳамзамон, се паҳлавони дигари тоҷикистонӣ- Саидмухтор Раҳимов ва Қонун Охунов дар вазни то 73 кг ҷойҳои панҷум ва Рашид Зиёбеков дар вазни то 81 кг ҷойи 7-умро гирифтанд.
Ба иттилои Федератсияи дзюдои Тоҷикистон гуштигирони ҷавони тоҷик дар айни ҳол дар Маркази омодагии олимпии Челябинск ҳамроҳ бо варзишгарони русиягӣ тамрин мекунанд.
Маврид ба ёдоварист, Комроншоҳи Устопириён моҳи октябри соли равон дар мусобиқаи қаҳрамонии ҷаҳон оид ба самбо дар Булғористон дар сабқати навҷавонон дар вазни то 90 килограмм пирӯз гашта, бо медали тилло мукофотонида шуда буд. Инчунин ӯ барандаи медали биринҷии мусобиқаи имсолаи қаҳрамонии Осиё дар риштаи дзюдо миёни навҷавонон мебошад.
Мӯҳр