КБМ ба Тоҷикистон беш аз 42 миллион доллари ИМА ҷудо намуд

Эмомалӣ Раҳмон, президенти Тоҷикистон Димитрис Ситсирагос, ноиби президенти Корпоратсияи байналмилалии молиявиро (КБМ) ба ҳузур пазируфт.

Бино ба иттилои маркази матбуотии президент, дар мулоқот масоили ҳамкорӣ бо ин муассисаи бонуфузи ҷаҳонӣ ва дастгирии рушди иҷтимоию иқтисодии Тоҷикистон баррасӣ гардид.

Гуфта мешавад, зимни ин нишаст аз афзоиши маҷмӯи маҳсулоти дохилии Тоҷикистон дар соли 2012, ки ба 7,5 фоиз расид ва таваррум, ки дар сатҳи 6.8 фоиз қарор гирифт, изҳори қаноатмандӣ карда шуд.

Манбаъ мегӯяд, ба фаъолияти Корпоратсияи байналмилалии молиявӣ дар Тоҷикистон баҳои баланд дода шуд ва зикр гардид, ки танҳо дар се соли охир аз ҷониби ин муассиса беш аз 42 миллион доллари америкоӣ маблағ барои татбиқи лоиҳаҳои муҳими сармоягузорӣ дар бахшҳои мухталифи иқтисод ва рушди низоми идорӣ ҷудо гардидааст.

Ҳамзамон густариши минбаъдаи ҳамкорӣ барои дастгирии соҳибкории хурду миёна, коркарди пурраи ашёи хоми маҳаллӣ, таъмини амнияти энергетикию озуқаворӣ, рушди инфрасохтор ва мусоидат ба сохторҳои молиявию ҳуқуқӣ барои беҳсозии пайвастаи фазои сармоягузорӣ зарур шумурда шуд.

Таъкид шуд, ки аз ҷониби Корпоратсияи байналмилалии молиявӣ дар  Тоҷикистон дар бахши тиҷорати кишоварзӣ як қатор лоиҳаҳо дар марҳилаи амалишавӣ қарор дошта самтҳои асосии раванди ҳамкориҳо ба таъмини амнияти озӯқаворӣ ва истиқлолияти энергетикӣ, таъмини ҷойҳои нави корӣ ва азхудкунии захираҳои канданиҳои фоиданоки Тоҷикистон нигаронида шудаанд.

Мӯҳр