Мақомот алайҳи Димон Ашӯров, ки моҳе қабл аз аз Чин ба Душанбе истирдод шуд, иттиҳомоти нав пеш гузоштаанд.
Димон Ашӯров, сокини шахри Хоруғ, ки бештар бо номи Давлатбек Давлатбеков маъруф аст, баробари қаллобӣ ва фирор аз мақомот, акнун дар созмони гуруҳи ҷиноӣ, ташкили бетартибиҳои оммавӣ ва зурӣ нисбати намояндагони ҳукумат гунаҳкор карда мешавад.
Тавре Шуҳрат Қудратов, вакили дифои Димон Ашӯров, мегӯяд, аз иттиҳомоти пешниҳодшуда, зерҳимояаш танҳо қаллобиро эътироф кардааст. Ба гуфтаи вакили мудофеъ моҳи декабр, Додситонии кулли Тоҷикистон тамоми ширкаткунандагони ҳаводиси моҳи июли Хоруғро, ки ихтиёран силоҳ таслим кардаанд, авф намуд, вале чаро ин иқдом ба Ашӯров дахл надоштааст, ҳанӯз суоли матраҳ аст. Қудратов изҳор дошт, ки айни ҳол машғули таҳияи аснод аст, то беасосии иттиҳомоти навро алайҳи зерҳимояаш нишон диҳад.
Димон Ашӯров, яке аз афроди наздик ба Имомназар Имомназаров, собиқ пешвои ғайрирасмии Бадахшон арзёбӣ мешавад, ки тобистони соли гузашта, зимни амлиёти мақомоти қудратӣ дар Хоруғ боздошт гардид. Мавсуф бо гумони қаллобӣ боздошт шуда буд, аммо аз ошёнаи дуюми бинои Раёсати корҳои дохилии вилоят худро партофта, ба беморхона афтид. Моҳи ноябри соли гузашта аз беморхона дар Хоруғ фирор карда, барои табобати пойҳояш ба шаҳри Урумчии Чин рафтааст. Аммо тибқи созишномаи Тоҷикистону Чин моҳи январ ба Душанбе истирдод шуда, айни ҳол дар боздошгоҳи муваққатии Кумитаи амнияти миллӣ қарор дорад.
Мӯҳр