Мунтахаби Тоҷикистон аз Филиппин шикаст хӯрд
Мунтахаби Тоҷикистон оид ба футбол дар дидор бо яккачини Филиппин ноком шуд.
Ин дидор шаби гузашта дар доираи мусобиқаи интихобии қаҳрамонии Осиё-2019 дар Варзишгоҳи марказии Душанбе бо иштироки 15 ҳазор тамошобин доир гашт. Меҳмонҳо бо ҳисоби 4:3 дастболо шуданд.
Ин дар ҳолест, ки мунтахаби футболи Тоҷикистон дар доираи ин сабқат қаблан бо ҳисоби 1:2 аз тими миллии Яман шикаст хӯрда буд.
Яккачини кишвар дар мусобиқаи интихобии қаҳрамонии Осиё-2019 шомили гуруҳи “F” буда, ҳеч имтиёз надорад.
Филиппин бо 6 имтиёз дар садри ҷадвал, Яман бо 4 имтиёз дар ҷойи 2 ва Непал бо 1 имтиёз дар мақоми 3 қарор доранд.
Барои роҳ ёфтан ба Ҷоми Осиё-2019 яккачини Тоҷикистонро зарур аст, чор бозии баъдиро бо ғолибият анҷом бидиҳад.
Дидори навбатии мунтахаби кишвар дар доираи ин мусобиқот 5 сентябр бо Непал баргузор мешавад. Ин қувваозмоиро Катманду мизбонӣ мекунад.