Ҳушдори вазири маорифи Тоҷикистон ба нашриёту матбааҳо

Нуриддин Саидов, вазири маорифи Тоҷикистон роҳбарону намояндагони нашриётҳоеро, ки ба чопи китобҳои дарсӣ машғуланд, вазифадор кард, ки то 2-уми марти соли равон китобҳои боқимондаро нашр карда ба вазорати маорифи Тоҷикистон пешниҳод намоянд.

---

Тавре Сиддиқ Муборак, сухангӯи ВМ ба хабаргузории «Озодагон» иттилоъ дод, ин нуктаро вазир зимни як нишасти вижа бо масъулини соҳа иброз дошт.

-Нуриддин Саидов дар мавриди ба таъхир афтодани мӯҳлати нашри қисми зиёди китобҳои дарсӣ аз сӯи нашриётҳо ноширонро интиқод намуд,-афзуд манбаъ.

Оқои Муборак илова кард, ки алъон  31 номгӯи китоби дарсӣ дар дасти чоп аст, танҳо се номгӯй пурра ва боқимондааш қисман ва ё тамоман нашр нашудааст. Гуфтанист, тибқи  қарордоди вазорати маорифи ҷумҳурӣ ва нашриётҳо, аз мӯҳлати иҷрои чопи китобҳои дарсӣ 6 моҳ сипарӣ гардидааст: «Саидов зимни мулоқот ълом дошт, ки афзалият ба он нашриётҳо дода  мешавад, ки китобҳои дарсиро саривақт ва бо сифати баланд чоп намоянд».