Душанбе: 66-солагии Ғалаба дар боғи Ғалаба

Солгарди навбатии пирӯзӣ бар фашизми гитлерӣ бо ширкати президенти Тоҷикистон Эмомалӣ Раҳмон баргузор гардид.

Дар чорабинии мазкур, ки субҳи имрӯз дар боғи Ғалабаи пойтахт сурат пазируфт, ба ҷузъ сарвари давлат райиси палатаи болоии парлумон Маҳмадсайид Убайдуллоев ва вазирони мудофиаву корҳои дохилӣ- Шералӣ Хайруллоев ва Абдураҳим Қаҳҳоров иштирок доштанд.

Зимнан, раисҷумҳур аснои мулоқоташ бо собиқадорони ҷангу меҳнат онҳоро итминон дод, ки давлат ва ҳукумати кишвар дар ҳаққи онҳо ҳамеша ғамхорӣ хоҳад кард.

Ёдрас менамоем, замони Ҷанги Бузурги Ватанӣ ҳудуди беш аз 300 ҳазор фарзандони Тоҷикистон дар ҷабҳаи набард ширкат карда, 92 ҳазори онҳо дар майдони ҷанг қурбон шудаанд. Азҷумлаи фиристодагони халқи тоҷик 55 нафар бо гирифтани унвони олии Қаҳрамони Иттифоқи Советӣ шарафёб гардидаанд. Тибқи иттилои расмӣ айни замон дар ҷумҳурӣ 2559 нафар иштирокчиёни Ҷанги Бузурги Ватанӣ ба сар мебаранд.