Талаби то 30 соли зиндон барои муттаҳамон дар қатли Саъдӣ ва Сорбон
Айбдоркунандаи давлатӣ дар мурофиа алайҳи 10 муттаҳам дар куштори Сорбон Музаффарбеков ва Саъдӣ Сатторов дар Душанбе то 30 соли зиндони низомаш сахт бо мусодираи молумулк талаб кардааст.
Тавре Муҳаммадисо Раҷабов, яке аз вакилони ширкаткунанда дар мурофиа ба “Озодагон” иттилоъ дод, айбдоркунандаи давлатӣ аз ҷумла ба бародарон Муродовҳо-Шералӣ ва Ҷаҳонгир мувофиқан 30 ва 6 соли зидон талаб кардааст. Додситонӣ талаб кардааст, ки нисбати Шералӣ Муродови 22-сола, ки аз омилони асосии куштори ду ҷавон дар Душанбе арзёбӣ мешавад, ҳукми 30 соли зиндони низомаш сахт бо мусодираи молу мулк татбиқ гардад.
Барои айбдоршавандаҳои дигар, аз ҷумла барои Камолиддин Тошзодаи 21-сола 23 соли зиндони низомаш сахт бо мусодираи амвол, барои Шарафҷони Абдулазиз 23-сол, барои Кабутов Сайфулло 20 соли зиндон бо мусодираи молу мулк ва Наимов Дилшод-6 соли зиндон бо мусодираи амвол талаб карда шудааст.
Айбдоркунанда талаб кардааст, падари Шералӣ ва Ҷаҳонгир-Салим Муродов барои пешниҳоди ҳуҷҷати қалбакии тиббӣ 3,5 сол зиндонӣ шавад ва духтур Домуллоҷонов, ки ин ҳуҷҷатро додааст, ба миқдори 750 нишондиҳанда барои ҳисобҳо ҷарима ва 5 сол аз ҳаққи машғул шудан ба фаъолияти тиббӣ маҳрум гардад.
Маврид ба зикр аст, ки қатли Саъдӣ Сатторови 25-сола моҳи апрели соли 2013 дар тарабхонаи “Шаҳрисабз”-и пойтахт сурат гирифтааст. Баъдан Вазорати умури дохилии Тоҷикистон эълон кард, ҳафт нафари муттаҳам дар куштори Саъдиро боздошт намудааст, ки дар миёнашон Ҷаҳонгир ва Шералӣ Муродовҳо низ буданд.
Дар пайи ин ҳодиса, волидони Саъдӣ Сатторов низ аз Эмомалӣ Раҳмон, раисиҷумҳури Тоҷикистон дархост карданд, то тафтишоти қазияро зери назорати худ бигирад. Волидони ин ҷавони марҳум аз он нигаронӣ карданд, ки гӯиё қотили эҳтимолии фарзандашон аз оилаҳои бонуфузи Тоҷикистон аст ва дар гузашта низ аз ҷавобгарӣ барои чандин ҷиноятҳои вазнин халос шудааст.
Ин афрод инчунин дар куштори Сорбон Музаффарбеков, муштзани тоҷик, ки 26 августи соли 2012 дар наздикии тарабхонаи “Бешаи палангон”-и шаҳри Душанбе бо зарби корд захмӣ шуда, баъдан дар бемористон ҷон дода буд, муттаҳам мешавад. Мақомот дар марги ӯ Шералӣ Муродови 22-сола, Камолиддин Тошзодаи 21-сола ва Абдулазиз Шарифҷони 24-соларо айбдор мешуморанд.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |