19 мар 2014 12:43Хабарҳои ҷаҳон

Зиндонии маъмурони пулис дар робита ба куштори 37 ҷонибдори Мурсӣ

Яке аз додгоҳҳои шаҳри Қоҳира чаҳор корманди пулисро дар робита ба кушта шудани 37 ҷонибдори Муҳаммад Мурсӣ, раисиҷумҳури барканоркардаи Миср маҳкум ба зиндон кардааст. Ин ҷонибдорони боздоштшудаи Мурсӣ дар роҳ ба сӯи зиндони Абузаъбали Миср аз норасоии ҳаво ва ҳаротати гармӣ дар дохили нақлиёт ба ҳалокат расида буданд.

Тибқи иттилои расонаҳои мисрӣ, Умар Форуқ, муовини раҳбари Шуъбаи умури дохилии Қоҳира барои бетаваҷҷуҳӣ ҳангоми ифои вазифааш ба муҳлати 10 сол аз озодӣ маҳрум шудааст. Ҳамзамон се корманди пулиси дигар низ дар робита ба ин қазия ба муҳлати се сол равонаи зиндон шудаанд.

Расонаҳои хабарии Миср, рӯзи 18 августи соли гузашта аз кушта шудани 37 нафар ҷонибдори боздоштшудаи Мурсӣ ҳангоми интиқол ба маҳбасхонаи Абузаъбал, воқеъ дар вилояти ҳамҷивори Қоҳира дар дохили нақлиёт хабар дода буданд. Баъдан Вазорати умури дохилии Миср бо пахши як баёния ин ҳодисаро шарҳ дода, гуфта буд, ин афрод дар роҳ ба сӯи зиндон фирор карда, дар натиҷаи партофтани гази ашковар аз суи маъмурини пулис барои боздоштанашон ба ҳалокат расидаанд.

Дар ҳамин ҳол, мақомоти додгоҳии Қоҳира гуфтааст, маъмурини пулис дар нақлиёте, ки танҳо ғунҷоиши 24 нафар имкон дошт, 45 нафарро савор карда буданд. Ҳашт нафари наҷотёфта дар ин қазия далели марги ҳамсафарони худро ба муҳлати тулонӣ боқӣ мондан дар дохили нақлиёт арзёбӣ кардаанд. Онҳо мегӯянд, дар дохили нақлиёте, ки мусофирон тақрибан як баробари ғунҷоишаш зиёд буд, беш аз 7 соат дар назди даромадгоҳи маҳбасхона зери ҳарорати гармии ҳаво нигоҳ дошта шудаанд.

Нооромиҳои Миср дубора баъди барканор шудани Муҳаммад Мурсӣ аз сӯи артиши ин кишвар оғоз ёфта, аз моҳи июни соли гузашта ба ин сӯ боздошт ва шиканҷаву қатли ҷонибдорони ӯ идома дорад. Гуфта мешавад, бори аввал аст, яке аз додгоҳҳои Миср маъмури пулисеро барои қатлу хунукназарӣ равонаи зиндон мекунад.

Мӯҳр

Хабарҳои монанд: