Ҳамсари Қувватов: Мехоҳанд шавҳарамро аз байн баранд, чун сирри зиёдро медонад
Қумриниссо Қувватова, ҳамсари Умаралӣ Қувватов, роҳбари созмони мухолифи “Гуруҳи 24”, ки чанде пеш аз боздоштгоҳи Дубай раҳо шуд, изҳор медорад, ки хонаводаашон ҳамоно зери фишор қарор дорад.
Қумриниссо Қувватова дар суҳбат ба “Озодагон” гуфт, ки баъди озодии шавҳараш фишор болои хонаводааш афзоиш ёфтааст. Хонум Қувватова мегӯяд, ки баъди раҳоӣ талош кард, то шавҳари худро аз идомаи эътирозҳояш алайҳи ҳукумат боз дорад, чун ба ҷонашон хатар вуҷуд дорад: “Бо вуҷуд фишорҳо идома доранд. Кӯдакони ман давоми ду соли охир на ба мактаб ва на ба берун мебароянд. Ман дигар хомӯш буда наметавонам, ҳамон тавре ки шавҳарам. Шавҳари ман дар рӯзҳои наздик баромад хоҳад кард. Шояд ин рӯзҳои охири мо бошанд.”
Қумриниссо Қувватова мегӯяд, ки гуиё шавҳараш асрори зиёдеро медонад ва бинобар ин нерӯҳое ҳастанд, ки мехоҳанд, ӯро нобуд кунанд.
Умаралӣ Қувватов тобистони соли 2012 дар Маскав “Гурӯҳи 24”-ро таъсис дода ва аз Эмомалӣ Раҳмон даъват карда буд, то дар интихоботи президентӣ номзадиашро нагузорад. Қувватов шарики собиқи тиҷории яке аз домодҳои раисиҷумҳури Тоҷикистон арзёбӣ мешавад, ки то фирораш ба Маскав дар як соли пеш раҳбарии ширкатҳои “Тоҷирон” ва “Фароз”- аз ширкатҳои асосӣ дар бозори фурӯши сӯзишвории Тоҷикистонро - бар ӯҳда дошт.
Баъд аз таъсиси “Гурӯҳи 24” Қувватовро шарикони собиқаш ба дуздии 6 миллион сомонӣ аз ширкати “Фароз” айбдор карданд. Моҳи декабри соли 2012 ӯ бо дархости мақомоти Тоҷикистон дар шаҳри Дубайи Имороти Муттаҳидаи Араб боздошт шуд. Додгоҳи Дубай дар моҳи апрели соли гузашта ҳукми бозпас фиристодани ӯ ба Душанберо содир кард. Вале Умаралӣ Қувватов аз ин ҳукм ба додгоҳи таҷдиди назар шикоят бурда, аз боздошт раҳо гардид. Вале мақомоти Додситонии кулли Тоҷикистон мегӯянд, қазияи Умаралӣ Қувватов ниҳоӣ нашуда, додгоҳи Дубай низ дар ин бора ба онҳо чизе нагуфтааст.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |