Эшони Нуриддин зидди рафтани зан ба ҳаҷ бидуни маҳрам
Эшони Нуриддин, руҳонии маъруфи тоҷик ва яке аз бародарон Тураҷонзодаҳо рафтани зан ба зиёрати Хонаи Худоро бидуни маҳрам (шавҳар, писар, бародар, тағову амак ва ҷиян) нораво хондааст.
Ин руҳонии маъруфи тоҷик дар посух ба суоли корбари торнамои Turajon.org, гуфтааст, “ба ҳаҷ рафтани зан бе маҳрам назди аксари олимон ҷоиз нест ва вуҷуди маҳрамро барои зан дар сафар ба ҳаҷ шарт кардаанд.”
Эшони Нуриддин дар шарҳи гуфтаҳояш илова кардааст, ки танҳо бар асоси мазҳаби Имом Шофиӣ агар зан барои адои ҳаҷҷи фарзӣ бидуни маҳрам бо занҳои боэътимод сафар кунад ҷоиз аст. Аммо ба гуфтаи ӯ, дар ҳаҷҷи нафлӣ тамоми олимон ҳузури маҳрамро барои зан шарт донистаанд: “Дар ҳаҷҷи нафлӣ назди тамоми олимон ва ҳатто шофииҳо бе маҳрам сафар кардани зан ҷоиз нест.”
Ин дар ҳолест, ки Юсуф Қарзовӣ, раиси Иттиҳоди мусулмонони ҷаҳон, ахиран бо судури фатвое сафари занонро ба Ҳаҷ бидуни маҳрам раво хонда буд. Қарзовӣ ба суоли яке аз корбарони торнамои “qaradawi.net” гуфт, ҳар чанд аз Паёмбар (с) аҳодисе дар мавриди мамнуъ будани мусофирати зан дар танҳоӣ омадааст, вале дар замони мо бонувон дар сурате, ки маҳрам надоранд, метавонанд худ ба зиёрати хонаи Худо раванд. Ба гуфтаи Юсуф Қарзовӣ, сафарҳои ҳозира ба мисли сафари давраҳои пешин хавфу хатари зиёд надорад. Ӯ мегӯяд,“имрӯз шумораи зиёди мардум дастҷамъона тавассути ҳавопаймо, автобус ё киштӣ ба Ҳаҷ сафар мекунанд, ки дигар ҳарос аз рӯбарӯ шудан бо дуздону роҳзанон дар роҳ боқӣ намондааст.”
Ҳаҷ аз ҷумлаи аркони панҷгонаи дини мубини Ислом аст, ки барои ҳар мусалмони ба балоғатрасида ва тавоно фарз мебошад. Ҳамасола аз Тоҷикистон ҳудуди шаш ҳазор барои зиёрати Хонаи Худо ба Макка мераванд.
Соли гузашта, пардохти маблағи ҳаҷ 17 ҳазору 625 сомониро ташкил медод, ки ба гуфтаи мақомоти тоҷик ба ин хизматрасониҳо пули чипта ё билети ҳавопаймо (рафту бозгашт), иҷораи меҳмонхона дар шаҳрҳои Маккаву Мадина, се бор ғизо дар як рӯз, хидмати роҳбаладон, кумаки аввалияи тиббӣ, эмгузаронӣ зидди касалиҳои сирояткунанда, ҷузвдон, либос ва ғайраҳо шомиланд.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |