Абдулқодирзода дар бораи арчаи солинавӣ ва хурсандии пайравони Исо (а)
Сайидмукаррам Абдулқодирзода, раиси Шӯрои уламои Маркази исломии Тоҷикистон дар арафаи таҷлил аз соли нави милодӣ дар хутбаи намози ҷумъа таъкид кард, “рафтан ба гирди арчаи солинавӣ инсонро кофир намекунад”.
Ин нуктаро оқои Абдулқодирзода рӯзи 26 декабр дар Масҷиди марказии шаҳри Душанбе баён дошт. Ӯ гуфт, ҳоло бархе руҳониён рафтан ба гирди арчаи солинавиро омили кофиршавии инсон медонанд, ки чунин нест: “Ба гирди арча рафтану аз пеши арча гузаштан инсонро кофир намекунад. Бо вуҷуди ин ки иди мазҳабӣ ва динии мо нест. Аммо инсонро кофир намекунад.”
Ба гуфтаи раиси Шӯрои уламои Маркази исломии Тоҷикистон бар асоси эътиқоди пайравони баъзе аз динҳо, гӯиё Ҳазрати Исо (а) дар зери арча ба дунё омадаасту онҳо дар гирди он хурсандию хушҳолӣ мекунанд: “Мегӯянд, дар соли нав дар гирди арча инсон кофир мешавад, аз барои Худо аз Худованд тарсед, ҳоло он ки эътиқоду ихлоси баъзе аз динҳо ҳаст, ки гӯиё Ҳазрати Исо (а) дар зери арча ба вуҷуд омада бошаду онҳо дар гирди он хурсандию хушҳолӣ мекунанд.”
Сайидмукаррам Абдулқодирзода инчунин таъкид кард, бо пӯшидани навъе аз либос инсон кофир намешавад. Ӯ изҳор дошт, “ҳафтаи гузашта комилан мо дар доираи як сафари расмӣ дар вилояти Хатлон қарор доштем. Бародаре аз мо савол кард, ки ҳоло дар мо ду никоҳ ба миён омадааст, яке пеш аз ЗАГС ва дигаре баъд аз ЗАГС. Ин бар асоси ақидаи бегонае ба вуҷуд омадааст, ки мехоҳад, миёни мардум адовату душманӣ ҷорӣ кунад ва шакку шубҳа дар зиндагӣ орад. Кӣ гуфтааст, инсон бо содир кардани гуноҳе кофир мешавад? Инсон бо муртакиби гуноҳ гунаҳкор шуда, ба азоби Худованд гирифтор мешавад. Аммо кофир шудан ин ширк овардану инкор кардани Худованд аст”.
Раиси Шӯрои уламои Маркази исломӣ аз сокинони кишвар даъват кард, ба фатвоҳои бархе аз руҳониёни кишвар, ки ба гуфтаи ӯ, фаҳму дарки амиқе аз Қуръону суннат надоранд, гӯш надиҳанд: “Навъи дигари зулм, ин содир кардани фатвоҳо миёни мардум аст. Бархе одамон на мақоми расмӣ доранд ва на ҷиҳате ба расмият шинохта шудаанду эътирофашон мекунанд, аз номи Ислому илм фатво содир мекунад”.
Ӯ дар идома ба “Гуруҳи 24”, ҳаракати фаъолияташ мамнуъ дар Тоҷикистон ишора карда, онро ҳамчун як нерӯи золим ном гирифт: “Зулм ба ҷомеаи муслмонӣ фитнаҳое мебошанд, ки ба хотири ба мақсад расидан, фитнаҳо миёни мардум паҳн мекунад. Ба монанди “Гуруҳи 24”-у дигару дигар. Инҳо танҳо мехоҳанд, обро лой кунанду моҳӣ гиранд, яъне ҷомеаро ноором кунанду ба мақсад бирасанд. Бо роҳи номардӣ ва зулму ситаму хунрезӣ. Магар инсон метавонад, бо ин роҳ ба мақсад бирасад?! Ҳамон гуруҳе, ки дар инҷо аз роҳи ҳарому ҳараҷ маблағ ҷамъ карду гурехту ба берун рафт, ҳоло он ҳаром дигар қарораш намегузорад. Мехоҳад ҳамаро ноором кунаду ба мақсад бирасад”.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |