11 янв 2016 09:05Тоҷикистон / Иҷтимоӣ

Даргузашти Бобо Бекмуродзода, яке аз асосгузорони барномаи “Хоки Ватан”

Бобо Бегмуродзода, корманди собиқи Шабакаи 1-и телевизиони Тоҷикистон дар сини 64-солагӣ даргузашт.

Бино ба иттилои наздикон, ҷанозаи марҳум 9 январ дар зодгоҳаш -- деҳаи Яккахонаи ҷамоати Рӯдакии ноҳияи Панҷакент ба хок супорида шуд.

Бобо Бегмуродов 11 январи соли 1952 дар ноҳияи Панҷакент ба дунё омадааст. Соли 1969 мактаби миёнаи рақами 18-и деҳаи Артуч ва соли 1974 факултаи филологияи тоҷики Донишгоҳи омӯзгории шаҳри Душанберо хатм кардааст.

Фаъолияти нахустини кории ӯ аз моҳи сентябри соли 1974 ба ҳайси муҳаррири барномаҳои ҷавонии телевизионии Тоҷикистон оғоз ёфта, худи ҳамон сол ба хизмати ҳарбии артиши Шӯравӣ дар вилояти Витебски Ҷумҳурии Белоруссия ҷалб мешавад. Баъд аз адои хизмати Ватан аз феврали соли 1976 Бобо Бекмуродзода аз нав ба телевизон баргашта, ба сифати муҳарири сиёсии телевизиони Тоҷикистон ба кор шурӯъ намуда, то соли 1980 дар ҳамин вазифа хизмат мекунад.

Бобо Бегмуродов аз моҳи декабри соли 1980 то январи соли 1983 дар ҳайати Қувваҳои маҳдуди Иттиҳоди Шӯравӣ дар Афғонистон дар вилоятҳои Фараҳ, Нимрӯз, Қандаҳор, Ҳирот ва Кобул фаъолият карда, аз моҳи декабри соли 1985 то соли 1989 бо гуруҳи мушовирони Шӯравӣ дар вазорату идораҳои Афғонистон корро идома медиҳад ва ҳамчун тарҷумони муовини аввали раиси вазирони Ҷумҳурии Афғонистон чанд сол адои вазифа кардааст.

Марҳум аз соли 1989 то соли 2009, яъне то бемор шуданашон мухбири шабакаи 1-и телевизиони Тоҷикистон дар шаҳру ноҳияҳои Панҷакент, Айнӣ, Кӯҳистони Мастчоҳ, Истаравшан, Шаҳристон буд. Бобо Бегмуровро ҳамкасбонаш ҳамчун асосгузори барномаи машҳури “Хоки Ватан” дар радиои Тоҷикистон ном мебаранд.

Барои хизматҳои арзанда бо орденҳои “Дӯстии халқҳо”, “Ситораи сурх”, медалҳои “Ҷасорат”, “Ташаккурнома аз халқи минатпазири афғон”, “Ифтихорномаи Шӯрои олии СССР” мукофотонида шудааст.

Мӯҳр

Хабарҳои монанд: