Иззат Амон сарпарастии модари танҳомонда бо 5 кӯдакро ба уҳда гирифт
Иззат Амон, раҳбари созмони ҷавонони тоҷик дар Русия сарпарастии Дилбар Гургова, модари танҳомондаи 5 фарзанди ноболиғро ба уҳда гирифтааст.
Иззат Амон, ки аз бунёдгузорони фонди “Кӯмак” мебошад, изҳор дошт, ҳар моҳ аз ҳисоби фонд 1000 сомониро барои таъминоти ин хонавода равона хоҳад кард. Фонди “Кӯмак” ҳудуди чор сол қабл барои кӯмак ба муҳоҷирони тоҷик дар Русия ташкил шуда, ба гуфтаи Иззат Амон маблағгузорони асосияш низ муҳоҷирони тоҷик мебошанд.
Дилбар Гургова, сокини 36 - солаи ноҳияи Шоҳмансури шаҳри Душанбе, ҳамсари Амрулло Нуров, муттаҳам дар узвият ба гуруҳи Ҳоҷӣ Ҳалим мебошад, ки охири ҳафтаи гузашта дар суҳбат бо "Озодагон" гуфт, барои фиристодани фарзандонаш ба мактаб шароит надорад ва мақомот барои ин ӯро ҷарима карданиянд.
Гургова изҳор дошт, ки шавҳараш Амрулло Нуров феълан дар боздоштгоҳ аст ва ӯ имкони молии таъмини чор фарзанди мактабхонашро надорад. Ӯ афзуд, ки додситонии ноҳияи Шоҳмансур алайҳаш бар асоси қонун дар бораи масъулияти падару модар дар тарбияи фарзанд парванда боз кардааст ва феълан маълум нест, ки ӯро чӣ қадар ҷарима интизор аст.
Ба гуфтаи Гургова масуълини мактаби 48-и ноҳияи Шоҳмансур барои нарафтани фарзандонаш ба мактаб алайҳи ӯ ба идораи пулиси ноҳия шикоят кардаанд. Ӯ изҳор дошт, ки дар хобгоҳи маҳаллаи 9-ум километр ба ивази 485 сомонӣ иҷоранишин аст ва 10 сомонӣ ҳақмузди якрӯзае, ки барои фаррошӣ мегирад, барои таъмини рӯзгори хонаводааш кифоя нест: “Аз мактаб пули моҳона талаб карданд, аммо ман надоштам. Аз ин рӯ дигар фарзандонам ба дарс нарафтанд”.
Ин модари серфарзанд илова намуд, ки аз 5 фарзандаш 4 нафарашон мактабхон мебошанд: “Ду фарзандам дар синфҳои 4 ва 5 ва ду нафари дигар дар синфи 2 таҳсил мекунанд. Бояд як фарзандам дар синфи 3 таҳсил мекард, аммо аз сабаби надоштани шароит аз таҳсил қафо монд ва акнун дар синфи 2 мехонад. Дирӯз маро прокуратура даъват кард ва ман фарзандонамро бо худ бурдам. Худи кормандони прокуратура диданд, ки дар пойи фарзандони ман “шлёпка” буду сумкаҳояшон даридагӣ буданд. Ҳар рӯз сумкаҳояшонро медӯзам, аммо чун фарсудаанд аз мактаб боз ба ҳамон сумкаҳои дарида бармегарданд. Либос надоранд фарзандонам, як шиму костюмро ба навбат мепӯшанд”.
Гургова илова кард, ки шавҳараш феълан дар боздоштгоҳ аст ва аз ҳоли ӯ ҳеч хабаре надорад: “Худам танҳо ҳамин 10 сомониро кор мекунам ва намедонам ягон чиз харам ё пули хобгоҳро диҳам. Аз шавҳарам хабаре надорам, ҳатто шароит нест, ки як бор ба ӯ хӯрок барам”.
Ин модари танҳо дар идома аз ҳукумат ва Президенти Тоҷикистон кӯмак хоста буд, ки ҳадди ақал хобгоҳро барои ӯ ройгон ироа кунанд, то ӯ ҳақмузди худро барои ғизо ва лавозимоти мактабии фарзандонаш харҷ кунад.
Дар пайи нашри ин матлаб бархе аз хонандагони "Озодагон" ва корбарони интернет изҳор доштанд, ки дар сурати боз кардани суратҳисоби махсуси бонкӣ ба ин хонаводаи ниёзманд кӯмаки худро ироа хоҳанд кард.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |