Анҷоми тафтишоти марбут ба ҷасадҳои салафанпечи 5 тоҷик
Кумитаи тафтишотии вилояти Орлов аз анҷоми таҳқиқи парванда алайҳи Аҳмад Аҳмадов ва Беҳрӯз Саидов хабар дод, ки дар марги 5 шаҳрванди Тоҷикистон айбдор мешаванд.
Қазияи марги 5 тоҷик, ки ҷасадҳои “салафанпеч”-ашон дар вилоёти Маскав ва Тула дарёфт шуда буд, моҳи июли соли гузашта пурсарусадо гардид.
Тибқи иттилои мақомоти тафтишотии Русия муайян шудааст, ки Аҳмадов барои дуздии маҳсулоти нафтӣ аз лӯлаи “Куйбишев-Брянск” Саидов ва 5 шаҳрванди дигари Тоҷикистонро кироя кардааст: “8-уми июл вақти буридани лӯла дар ноҳияи Орлов 5 шаҳрванди Тоҷикистон аз дуди заҳролуд дар нақб нафасгир шудаанд. Газҳои заҳролуд дар пайи истифодаи генератори бензинӣ дар нақб ба вуҷуд омадаанд”.
Ба иттилои манбаъ дар пайи ин Саидов аз қазия Аҳмадовро огоҳ мекунад: “Аҳмадов ва Саидов ҷасади муҳоҷирони фавтидаро ба мошин бор карда, се нафари онҳоро дар истгоҳе дар Тула ва ду тои онҳоро ба ҷангали канори роҳе дар вилояти Маскав партофтаанд”.
Мақомоти тафтишотӣ афзуданд, муттаҳамон баъди ин ба ҷои фоҷеа баргашта ба маблағи 9 ҳазор рубл аз лӯла маводи сӯхт дуздидаанд: “Феълан таҳқиқи парвандаи ҷиноӣ алайҳи Аҳмадов ва Саидов бо иттиҳоми расондан ба марг дар пайи беэҳтиётӣ, вайрон кардани лӯлаи маҳсулоти нафтӣ ва дуздӣ анҷом ёфта, барои баррасӣ ба додгоҳ ирсол шуд. Муттаҳамон гуноҳашонро пурра иқрор карда, изҳори пушаймонӣ мекунанд”.
Дар пайи ин қазия шаҳрвандони Тоҷикистон Хуршед Шарифович Ёрматов, соли таваллудаш 1988, Самандар Салимович Халифаев, соли таваллудаш 1989, Шаҳром Набиев, соли таваллудаш 1988, Солеҳҷон Одилович Дилшодов, соли таваллудаш 1982 ва Фирдавсӣ Ашӯрович Нодиров, соли таваллудаш 1980, сокинони навоҳии Ҳамадонӣ, Данғара ва Қумсангир ба ҳалокат расида буданд.
Мӯҳр
ТАҚВИМ
« Март 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |