13 сен 2016 12:21Тоҷикистон / Сиёсат

Эмомалӣ Раҳмон гуфт, даҳҳо сокини Суғд ба хотири манфиатҳои бегонагон ба ҳалокат расидаанд

Раисиҷумҳури Тоҷикистон гуфтааст, наздики 400 сокини вилояти Суғд ба ҳизбу ҳаракатҳои ғайриқонунӣ шомил шудаанд, ки 36 нафари онҳо сокини ноҳияи Спитамен мебошанд. Эмомалӣ Раҳмон ин нуктаро имрӯз, 13 сентябр аснои мулоқот бо роҳбарону фаъолон ва сокинони ноҳияи Спитамен изҳор дошта, таъкид кардааст, “то имрӯз даҳҳо нафари онҳо ба хотири манфиатҳои бегонагон ба ҳалокат расидаанд”.

Бино ба иттилои дафтари матбуоти Президенти Тоҷикистон, Эмомалӣ Раҳмон изҳор дошта, ки замони муосир дар баробари пешрафти илму техника, инчунин, масъалаҳоеро ба миён гузоштааст, ки дарки онҳо донишу ҷаҳонбинии мукаммал, ҳушёриву зиракӣ ва мавқеи устувори шаҳрвандии ҳар фарди ҷомеаро талаб мекунад: “Хусусан, дар солҳои охир тавсеа пайдо намудани зуҳуроти нангину хатарноки терроризму ифротгароӣ, ки аксаран таҳти шиорҳои динӣ ва зери ниқоби ислом сурат гирифта, аслан ба дини мубини ислом иртиботе надоранд, аз ҷониби душманони ин дини муқаддас роҳандозӣ шуда, барои ноором сохтани вазъи ҷомеаи ҷаҳон истифода мешавад”.

Ба гуфтаи раисиҷумҳур, роҳбарон, падару модарон, аҳли маориф ва фаъолони ҷамъиятӣ муваззафанд, корҳои тарбиявиро миёни наврасону ҷавонон вусъат бахшида, ба онҳо роҳи дурусти зиндагиро нишон диҳанд ва дар зеҳни наврасону ҷавонон ҳисси ифтихор аз давлати соҳибистиқлол ва ватани соҳибихтиёрро тарбия намоянд: “Бовар дорам, ки мардуми сарбаланди ноҳия ба шукронаи сулҳу суботи комили Ватан ва соҳибистиқлолии сарзамини аҷдодӣ минбаъд низ барои ободиву пешрафти кишварамон садоқамандона кору фаъолият карда, сиёсати Ҳукумати мамлакатро ҳамаҷониба дастгирӣ менамоянд ва дар пешрафту тараққиёти минбаъдаи кишвари азизамон саҳми сазовор мегузоранд”.

Мӯҳр

Хабарҳои монанд: