СММ ба Тоҷикистон: Мустақилият ва ҳуқуқи адвокатҳоро ҳифз намоед
Дафтари Созмони милали муттаҳид (СММ) оид ба ҳуқуқи инсон дар Осиёи Марказӣ аз ҳукми адвокатҳо Бузургмеҳр Ёров ва Нуриддин Маҳкамов ҷиддан изҳори нигаронӣ кардааст.
Ин ниҳод бо пахши як изҳорот гуфтааст, ин ду адвокат дар мурофиаи амалан пӯшида бо иттиҳомоти қаллобӣ, сохтакорӣ, “барангехтани кинаву адовати миллӣ, нажодӣ, динӣ” ва экстремизм мувофиқан ба 23 ва 21 сол зиндонӣ гардиданд.
Дар идомаи изҳорот омадааст, ҷаноби Ёров, сарвари Коллегияи адвокатҳои “Сипар” моҳи сентябри соли 2015 баъди иқдомаш барои ташкили кумитаи ҳифзи аъзои ҳизби мамнуи Ҳизби Наҳзати Исломии Тоҷикистон (ҲНИТ) ва расонаӣ кардани эҳтимоли шиканҷа шудани зерҳимояаш - муовини Раиси ҲНИТ дастгир шуда буд. Баъдтар, моҳи октябри соли 2015 ҷаноби Маҳкамов, ки ҳамчун ҳимоягари Ёров баромад менамуд, ҳамчунин дастгир гардида, минбаъд бо ҷурмҳои монанд маҳкум шуд. Илова бар ин, ҳарду аз машгул шудан ба фаъолияти адвокатӣ баъди адои ҷазо ба муҳлати 5 сол маҳрум шуданд: “Чунин ба назар мерасад, ки маҳкумияти онҳо бо фаъолияти қонунии касбии онҳо алоқаи зич дошта, интиқом барои расонидани кумаки ҳуқуқӣ ба аъзои ҲНИТ мебошад ва Идораи СММ оид ба ҳуқуқи инсон аз ин амиқан нигарон аст”.
Ришард Коменда, намояндаи Комиссари олии СММ оид ба ҳуқуқи инсон дар Осиёи Марказӣ дар ин изҳорот гуфтааст, “ин ҳукмҳо идомаи амалияи нигаронкунандаи айбдоркунии адвокатҳо буда, бо уҳдадориҳои давлат оиди эҳтиром ва таъмини мустақилияти адвокатҳо комилан мухолифанд”.
Гузоришгарон гуфтаанд, ин масъалаҳо ҳамчунин аз тарафи Давид Кайе, гузоришгари махсуси СММ оид ба пешбурд ва ҳифзи ҳуқуқ ба озодии ақида ва баён баъди сафари расмиаш ба Тоҷикистон дар моҳи марти соли 2016 таъкид шуда буданд: “Вай аз идомаи тарсондан, таҳқир ва таъқиби адвокатҳои раҳбарони ҲНИТ изҳори нигаронӣ карда, изҳор дошт, ки онҳо бояд аз боздоштгоҳ озод шаванд ва дар сурати озод нашудан, мурофиаи судии онҳо бояд одилона сурат гирифта, кафолатҳои мурофиаи дахлдор таъмин гарданд, аз ҷумла, мурофиаҳо бояд кушода бошанд ва далелҳои зидди онҳо бояд зери назорати аҳли ҷомеа ва холисона баррасӣ гарданд”.
Дар идома мехонем, принсипи 16-и Принсипҳои асосӣ оиди мақоми адвокатҳо аз Ҳукуматҳо даъват мекунад, ки аз ҷониби адвокатҳо "бе тарсу ҳарос, бе монеа, таҳқир ё дахолати нораво иҷрои кардани ҳамаи вазифаҳои касбии худро” таъмин намоянд ва адвокатҳо “набояд барои амале, ки дар асоси масъулияти касбӣ, стандартҳо ва ахлоқи касбӣ иҷро кардаанд, азоб кашанд, ё мавриди таъқиби ҷиноӣ, ҷазои маъмурӣ, иқтисодӣ ё ҷазои дигар қарор гиранд”: “Ғайр аз ин, дар принсипи 18 омадааст, ки "адвокатҳо дар аснои иҷрои вазифаҳои худ набояд бо муштариёни худ ё манфиатҳои онҳо алоқаманд карда шаванд”.
Ришард Коменда гуфтааст, “мақомот бояд аз алоқаманд намудани адвокатҳо бо манфиатҳои муштариёни онҳо худдорӣ кунанд. Ин бояд принсипи асосии ҳар як низоми ҳуқуқӣ бошад. Маҳкум намудани ду ҳимоятгар як ҳушдори аниқ ва зараровар ба ҷомеаи ҳуқуқии Тоҷикистон буда, ба интихоби муштариён аз тарафи адвокатҳо ва стратегияҳои намояндагии онҳо таъсири манфӣ мерасонад ва ҳамин тавр, ҳуқуқи универсалии намояндагии ҳуқуқиро зери хатар мегузорад”.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |