Раҷабиён аз қасди ҳамкории Душанбе бо Анқара дар заминаи уран хабар дод
Сафири Тоҷикистон дар Туркия мегӯяд, Тоҷикистон қасд дорад, барои истихроҷи зағолсанг ва уран бо Туркия ҳамкорӣ кунад.
Ин нуктаро сафири Тоҷикистон дар Туркия Маҳмадалӣ Раҷабиён дар суҳбат бо хабаргузории расмии “Анадолу” таъкид карда, гуфтааст, ки Душанбе хоҳони густариши равобит, аз ҷумла дар заминаи истихроҷи зағолсанг ва уран бо Анақра аст: “Мо дар сатҳи дуҷониба тавофуқномаҳое дар заминаи энергетика ба имзо расондаем, ки ҳадафи он тавлиди неруи барқи обӣ аст. Дар заминаи истихроҷи зағолсанг ва уран низ қасди ҳамкорӣ бо Туркияро дорем, аммо ин амр ба омодагии Туркия дар ин хусус вобаста мебошад”.
Сафири тоҷик дар суҳбат бо ин хабаргузорӣ гуфтааст, ки равобити Тоҷикистон бо Туркия дар сатҳи боло қарор дошта, ҳамакнун бо сафари Мавлуд Човушуғлу, вазири умури хориҷии Туркия ба Душанбе ба марҳалаи нави ҳамкорӣ ворид мешавад: "Интизор меравад сатҳи равобит миёни ду кишвар густариш ёбад. Иродаи мақомоти ҳар ду кишвар аст, ки муносибати дуҷониба беш аз пеш густариш ёбад. Сафари ҷаноби Мавлуд Човушуғлу, вазири умури хориҷии Туркия ба Ҷумҳурии Тоҷикистон сабаби ризоият ва хурсандии давлат ва милллати тоҷик аст”.
Маҳмадалӣ Раҷабиён дар мавриди интизориҳояш аз сафари Човушуғлу ба Тоҷикистон гуфт: “Мо медонем, ки дар ҷараёни сафари вазири Туркия тамоми масоили марбут ба рушд ва густариши равобити дуҷониба мавриди баррасӣ қарор хоҳад гирифт. Интизори мо беш аз ҳама он аст, ки дар ҷараёни сафари соли 2012-и раисҷумҳури Тоҷикистон ба Туркия, ҳарду ҷониб ибрози алоқа карданд, то як Шӯрои ҳамкорӣ дар сатҳи олӣ миёни ду кишвар таъсис диҳанд. Интизор дорем, ки ин шӯро таъсис ва фаъолияти худро оғоз кунад. Ҳадафи ин шӯро барраси масоили дуҷониба ва назорати ҷиддӣ бар густариши муносибатҳо бошад".
Сафир инчунин аз равобити тиҷоратӣ байни ду кишвар истиқбол карда, Туркияро аз ҷумлаи кишварҳое ҳисоб кард, ки дар тиҷорати хориҷии Тоҷикистон ҷои чаҳорумро ишғол мекунад.
Ин суҳбати сафири тоҷик бо расонаи туркӣ дар пайи сафари Вазири умури хориҷии Туркия Мавлуд Човушуғлу ба Душанбе сурат гирифтааст.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |