02 июн 2017 15:31Хабарҳои ҷаҳон / Сиёсат

Эътирози “Хаста аз марг ба сӯйи Арг”-и Кобул ба хушунат кашонда шуд (АКС)

Расонаҳои Афғонистон аз захмӣ шудани шуморе аз тазоҳургарони Кобул хабар додаанд. Ба гузориши телевизиони “Тулӯъ нюс”, шуморе аз муътаризин пас аз шиллики пулис захмӣ шудаанд. Ин тазоҳуроти густарда имрӯз, 2 июн дар пайи инфиҷори ду рӯз пеш дар Кобул бо номи “Хаста аз марг ба сӯйи Арг. Аз саросари Кобул ба тарафи Арг” роҳандозӣ шудааст.

Дар ин эътирозот чеҳраҳои сиёсӣ, фаъолони ҷомеаи маданӣ ва теъдоди зиёди шаҳрвандони Афғонистон ширкат доранд. Ба навиштаи расонаҳои Афғонистон вақте мӯътаризон ме‎хостанд худро ба наздикии қасри раёсатҷумҳурӣ бирасонанд, пулис ба хотири пароканда сохтани онҳо ба ҳаво шиллик кардаанд, ки дар натиҷа чанд нафар захмӣ шудааст.

Хабаргузории “Пажвок” теъдоди маҷруҳонро 8 тан гуфтааст. Баъзе аз захмиён гуфтаанд, неруҳои амниятӣ “мустақиман ба онон шиллик кардаанд”.

Мӯътаризон ба сӯйи чаҳорроҳи Занбақ – макони инфиҷори ду рӯз пеш рафта, аз раҳбарони ҳукумати Афғонистон хостаанд, амнияти мардумро таъмин кунад.

Бино ба гузоришҳо теъдоде аз эътирозгарон аз сӯйи пулис боздошт ва телефонҳояшон мусодира шудааст. Гуфта мешавад, эътирозгарон талош доранд ба Арги раёсатҷумҳурӣ наздик шаванд. Онҳо шиорҳое аз қабили “Марг бар ҳукумати Ғанӣ”-ро сар додаанд.

Мӯътаризин хостори барканории мақомҳои амниятӣ шудаанд. Аз ҷумла, онҳо мехоҳанд, мушовири амнияти миллӣ, раиси амнияти миллӣ, вазири умури дохила ва фармондеҳи пулиси Кобул аз мақомҳояшон канор бираванд.

Рӯзи гузашта мӯътиризон хоста буданд, ҳукумат аъзои зиндонии “Толибон” ва шабакаи “Ҳаққонӣ”-ро эъдом кунад. Дар пайи ин, раисҷумҳури Афғонистон ҳукми эъдоми 11 узви ин гуруҳҳоро содир кард, вале ба гузориши “Тулӯъ нюс” дар ин рӯйхат номи Анас Ҳаққонӣ, яке аз саркардаҳои шабакаи “Ҳаққонӣ” набудааст.

Субҳи 31 май дар маҳалли наздик ба Қасри раёсатҷумҳури Афғонистон, дафтари Созмони милали муттаҳид, Академияи улуми Афғонистон ва чандин сафоратхонаҳо, аз ҷумла Тоҷикистон таркиши шадид ба вуқӯъ пайваст. Вазорати тандурустии Афғонистон теъдоди кушташудаҳоро 80 ва шумори захмиёнро беш аз 300 нафар гуфт. Алъон ҳеч гуруҳе масъулияти ин таркишро бар дӯш нагирифтааст.

Мӯҳр

Хабарҳои монанд:

Академияи беилм

Латиф Пидром Президенти ояндаи Ҷумҳурии Исломии Афғонистон

Ҷавоб диҳед Иқтибос Шикоят

Рустам

Дар Афгонистон то масъалаи хати Дюранд ва мавзуи вахдати милли халли худро наебад ин чанги дохили солхои тулони идома хохад ефт.

Ҷавоб диҳед Иқтибос Шикоят

Юсуф

На президенти Афғонистон, на вазири амнияту дохилияш ва на пулис наметавонад ҳар як мошинро зидди маводи тарканда кофтуков кунад. Дар Кобул сад ҳазор зиёд мошин аст. Инчунин намешавад бадани ҳар як шахсро соп-соп кард, ки мина дорад ё не. Дар Кобул чанд миллион одам аст. Сабаби асосии нооромии тӯлонии афғонистон аз ҳад зиёд ифротӣ будани худи афғонҳо аст. Ҳар яке онҳо медонанд, ки кадом яке бо толибон хунхор ҳамкорӣ дорад, вале боз ҳам хомӯш мегарданд. То мардум масъули амнияти худ нагардад, то хурду калон аз таблиғоти муллоҳо дур нашаванд, ҳеҷ гоҳ дар Афғонистон сулҳ нахоҳад буд. Дар таҳкими амният бояд халқу ҳукумат дӯши ба дӯш фаолият кунанд. То мардум кӯмак накунад, ҳеҷ як ҳукумат коре карда наметавонад.

Ҷавоб диҳед Иқтибос Шикоят

Эзоҳ илова кунед