05 июл 2017 17:24Тоҷикистон / Рӯ ба рӯ / Акс

Э.Раҳмон роҳёбӣ ба бандарҳои Покистонро муфид хонд (АКС)

Эмомалӣ Раҳмон, раисиҷумҳури Тоҷикистон имрӯз, 5-уми июл дар мулоқот бо Муҳаммад Навоз Шариф, сарвазири Покистон аз равобит ва эътимоди сиёсӣ изҳори қаноатмандӣ карда, хостори густариши ҳамкориҳои иқтисодӣ шудааст.

Тибқи иттилои дафтари матбуоти раисиҷумҳури Тоҷикистон дар пайи музокироти сатҳи олии Тоҷикистону Покистон дар ҳузури роҳбарони ду давлат санадҳои нав, аз ҷумла изҳороти муштараки “Роҳ ба шарикии стратегӣ барои ҳамбастагии минтақавӣ”, Ёддошти тафоҳум байни ҳукумати Тоҷикистон ва ҳукумати Покистон оид ба ҳамкорӣ дар соҳаи тиҷорат ва Ёддошти тафоҳуми ҳамкорӣ байни Донишгоҳи аграрии Тоҷикистон ба номи Шириншоҳ Шотемур ва Донишгоҳи аграрии Равалпиндии Покистон ба номи Пир Алӣ Шоҳ Меҳр имзо шуданд.

Зимни мулоқот ҷонибҳо ҳарчи зудтар мувофиқа намудани Созишнома оид ба тиҷорати транзитии дуҷонибаро муҳим хонда, изҳори умед намуданд, ки доираҳои сармоягузории Покистон дар фаъолияти минтақаҳои озоди иқтисодии Тоҷикистон ва татбиқи лоиҳаҳои бузургу миёнаи кишвар дар соҳаҳои саноат, энергетика, инфрасохтори энергетикию нақлиётӣ, туризм, маориф ва тандурустӣ иштирок хоҳанд кард.

Эмомалӣ Раҳмон дар навбати худ зикр намудааст, ки Тоҷикистон кишвари маҳсур бо хушкӣ мебошад ва бори дигар манфиатдории худро ба истифодабарии имкониятҳои бандарҳои баҳрии Покистон ва шабакаҳои мавҷудаи транзитӣ барои тавсеаи тиҷорат дар сатҳи минтақа таъкид кардааст: “Роҳбарони ду давлат ҳамчунин ҳамдастии давлатҳоро дар заминаи татбиқи яке аз лоиҳаҳои дорои аҳамияти минтақавӣ ва муҳим барои кишварҳои Осиёи Марказию Ҷанубӣ - лоиҳаи КАСА – 1000 таъкид намудаанд”.