Айбдоркунандаи давлатӣ барои ду ҷавондухтар, ки моҳи декабри соли гузашта ҳангоми бозиҳои маҳрамона, ҷавони 24-солаи тоҷикро буғӣ карда куштанд, аз 8 то 14 соли зиндон талаб кардааст.
Тибқи иттилои мақомоти рус, мурофиаи ин парвандаи пурсарусадо дар додгоҳи вилояти Улянов идома дорад.
Кумитаи тафтишотии Русия мегӯяд, ду хоҳари 21 ва 17-сола, сокинони шаҳри Дмитровгради вилояти Улянов ҷавони 24-солаи тоҷикро ҳангоми бозиҳои маҳрамона куштаанд.
Ба иттилои манбаъ духтарон бо ҷавони тоҷик дар шабакаҳои иҷтимоӣ шинос шуда, барои мулоқот дар шаби 23-юми декабри соли 2016 созиш кардаанд: “Ҷавони тоҷик махсусан барои мулоқот бо духтарон дар бинои рақами 22-и кӯчаи Славск хона ба иҷора гирифта, дастархон оростааст. Зимни мулоқот ҷавонҳо бозиҳои маҳрамонаро оғоз намуда, духтарон ҷавони тоҷикро баста, буғӣ кардаанд”.
Ба иттилои тафтишот ҳангоми фирор духтарон маблағ ва ашёи ҷавони кушташударо гирифта, рӯзи дигар муттаҳами ноболиғ, гӯиё чизе нашудааст, ба мактаб рафтааст.
Дар назар аст, ки додгоҳ ҳукми худро дар мавриди ин парванда 2-юми октябр эълон кунад. https://www.youtube.com/watch?time_continue=41&v=K373XMpVxS0
Мӯҳр