Дар бозори озуқаи Тоҷикистон таи моҳи аввали соли ҷорӣ вазъият мўътадил буда, нархи баъзе аз маҳсулот ҳатто рўй ба коҳиш ниҳодаст.
Дар ин бора ба хабаргузории «Озодагон» аз Вазорати рушди иқтисод ва савдои Тоҷикистон хабар доданд. Ба иттилои масъулини ин вазорат нархи гўшти гов таи моҳи январ 1,3 фоиз коҳиш ёфта, айни ҳол як кило ба ҳисоби миёна 27 сомону 75 дирам нарх дорад. Килои гўшти гўсфанд 1 фоиз арзон шуда, 29 сомонӣ нарх дорад. Гўшти мурғ 1,8 фоиз арзон шуда, 15 сомонӣ нарх дорад.
Ба гуфтаи манбаъ, нархи як литр равғани растанӣ 2 фоиз поён рафта, ба ҳисоби миёна 9 сомону 60 дирам арзиш дорад. Нархи шир бетағйир монда ба ҳисоби миёна ба ивази 3,75 сомонӣ фурўхта мешавад. Таи моҳи равон нархи шакар 1,5 фоиз, орди истеҳсоли Қазоқистон 2,5 фоиз ва орди ватанӣ 2 фоиз арзон шудааст. Дар қатори маҳсулоти озуқаи таи моҳи январ қимматшуда, масъулини вазорати рушди иқтисод биринҷ – 2,5 фоиз, чои сиёҳ 2,8 фоиз, чои кабуд – 8,6 фоиз, себ -ро ном бурданд, ки 6 фоиз қиммат шудааст.
Дар муқоиса бо нархҳои моҳи январи соли гузашта масъулини Вазорати рушди иқтисод ва савдои Тоҷикистон иттилоъ доданд, ки нархи гўштти гов – 26,1 фоиз, гўшти гўсфанд 31,8 фоиз, равғани растанӣ 9,7 фоиз, шир 7,1 фоиз, тухм 26,9 фоиз, маҳсулоти макаронии ватанӣ 30,8 ва истеҳсоли хориҷӣ 38,9 фоиз қиммат шудаанд.
Мӯҳр