05 апр 2014 11:46Тоҷикистон / Сиёсат / Тема дня

Кӣ маъракаи “Довталаб-2014”-ро ба бизнес табдил медиҳад?

Бархе аз омӯзгорони макотиби миёнаи Тоҷикистон мегӯянд, мудирият онҳоро водор кардааст, дастурамали тозанашри “Роҳнамои довталаб”-ро ба ҳамаи хатмкунандагон, сарфи назар аз он, ки нияти дохилшавӣ ба макотиби олӣ дорад ё на бо арзиши аз 8 то 20 сомонӣ фурӯшанд.

Як омӯзгори мактаби миёна аз ноҳияи Қубодиён дар суҳбат бо “Озодагон” гуфт, мудири мактабашон ҳамаи хатмкунандагонро новобаста аз шароити оилавӣ маҷбур дорад, китобчаи “Роҳнамои довталаб”-ро харидорӣ намоянд.

Ин омӯзгор, ки ном ва рақами мактабашро низ зикр кард, вале “Озодагон” ба хотири гурез аз мушкилисозиҳои эҳтимолӣ номашро ифшо намекунад, гуфт: “Ростӣ, ман ҳамчун омӯзгор дар миёнароҳ мондаам ва касе ҳам ба мо намегӯяд, нархи расмии ин китобчаҳо чанд сум аст. Ҳоло аз 8 то 20 сомонӣ онҳоро фурӯхта истодаанд. Ҳатто талаб доранд, донишомӯзон аз оилаҳои камбизоат низ маблағи онҳоро пардохт кунанд. Аз мудири мактаб хостам, аз сағераҳо маблағ нагирам, аммо ӯ гуфт, маро маҷбур доранд, ки фурӯш.”

Ин омӯзгор аз қавли мудири мактабашон гуфт, ки гӯиё масъулини маорифи ноҳия ба онҳо дастур додаанд, то китобчаҳо ба ҳамаи хатмкунандагон, новобаста аз нияташон барои идомаи таҳсил фурӯхта шаванд.

Ин дар ҳолест, ки Мирзо Эшов, мудири Шуъбаи маорифи ноҳияи Қубодиён дар суҳбат бо “Озодагон” фурӯши иҷбории “Роҳнамои довталаб” дар макотиби миёнаи ин минтақаро рад карда, гуфт, ин хабарҳо асос надоранд: “Ягон масъули шуъбаи маориф ба ягон мудири мактаб дар ин бора дастуре надодааст ва албатта ин китобчаҳо бо нархи шаш сомонию 30 дирам ба донишомӯзон ироа шудааст ва ин ҳам ба таври ихтиёрӣ. Шояд ягон мудири мактаб ба ин кор худсарона даст задааст, вале мо ин масъаларо зери назорати қатъӣ мегирем.”

Маркази табъу нашри Вазорати маориф ва илми Тоҷикистон дар робита эълон кард, ки нархи давлатии китобчаи “Роҳнамои довталаб” 6 сомонию 30 дирамро ташкил медиҳад. Комилшо Исоев, раҳбари ин марказ мегӯяд, фурӯши ин китобчаҳо иҷборӣ набуда ва касе ҳам ҳақ надорад бо нархи гарон онҳоро ба фурӯш гузорад: “Мо ба тамоми шуъбаҳои маориф, бахусус ба дурдастрин минтақаҳо ба мисли ноҳияи Масчоҳи Куҳӣ, Мурғоб бо нархи 6 сомонию 30 дирам бурда расонидаем, ки касе ҳаққи аз ин зиёд фурӯхтани китобчаҳоро надорад." Аммо ба гуфтаи ӯ, "бархе аз марокизи табъу нашри хусусӣ низ шояд ба чопи ин китобчаҳо дар шакли ранга пардохта бошанд, ки албатта қиммати онҳо фарқ хоҳад кард.”

Исоев таъкид кард, ки ин амали марокизи хусусӣ худсарона ва ғариқонунӣ буда, фурӯшандаи китобчаҳои чопнамудаи онҳо низ дар макотиб ба ҷавобгарӣ кашида хоҳанд шуд.

Баробари ин омӯзгор аз ноҳияи Қубодиён илова кард, мақомоти ҳукумати маҳаллии ин минтақа тамоми хатмкунандагонро барои сабти ном кардан дар Маркази миллии тестӣ маҷбур доранд: “Тӯли се ё чаҳор рӯз мешавад, кормандони ҳукумат ва шуғлӣ аҳолӣ омада маҷбур доранд, то тамоми донишомӯзонамро барои сабти ном ба Маркази миллии тестӣ равон созам. Мо дар давлате зиндагӣ дорем, ки соҳибихтиёру демократӣ мебошад. Ҳар хатмкунанда худ бояд интихоб кунад, ки таҳсилро давом медиҳад ё не. Афроди шароит надоштааш чӣ гуна рафта худро сабти ном кунад.”

Ин дар ҳолест, хизматрасонӣ зимни супоридани ҳуҷҷатҳо ба Маркази миллии тестӣ 150 сомонӣ муайян шудааст.

Маркази миллии тестии назди президенти Тоҷикистон, ки имсол масъулияти қабули довталабон ба донишгоҳҳои кишварро ба дӯш дорад, ахиран аз тавҷҷуҳи ками довталабон шикоят карда буд. Сабтиноми довталабон дар Макази милли тестӣ аз 1-уми март шурӯъ гардида, то 15 -уми апрел идома меёбад. Феълан барои сабти номи довталабони муассисаҳои таҳсилоти олии касбии ҷумҳурӣ дар 11 шаҳру ноҳияи кишвар 20 нуқтаи бақайдгирӣ, аз ҷумла, дар шаҳри Душанбе ва ноҳияҳои тобеи ҷумҳурӣ 7 нуқта, дар вилояти Суғд 6 нуқта, дар вилояти Хатлон 6 нуқта ва дар Бадахшон 1 нуқта таъсис дода шудааст.

Мӯҳр

Хабарҳои монанд:

Юсуф

Собик омузгор,
Аз гуфтаҳои Шумо маълум мешавад, ки аз он пулҳои бо ҳар ҳилаву найранг аз талабаҳо ситондашуда директорони мактаб ба мудирони маъориф, милиса, прокурор ва Вазорати маъориф чутал (доля) медиҳанд?Ҳамон аст, ки солҳо боз пеши ин фасодро касе гирифта наметавонад. Кас ҳайрон мешавад, дар як синф фарзандони тамоми қишрҳои ҷомеъа (савдогар, коргар, муаллим, духтур, милиса, судяву прокурор, кормандони баландпояи давлатӣ) мехонанд. Аз ҳамаи онҳо пул ситонда мешавад. Аз чи боис, ҳама хомӯшанд.....? Аз чизе шарм медоранд ё рӯи хотири фарзанд мекунанд? Шояд ҳарду. Ба ҳар сурат, макотиби кишвар кайҳост, ки бидуни иззату обру монда, ба "аҷинабозор" табдил ёфтааст. Пас, аз "омӯзгорони" ин аҷинабозорҳо талаба чи меомӯзад?

Ҷавоб диҳед Иқтибос Шикоят

Эзоҳ илова кунед