01 мар 2014 12:13Тоҷикистон / Бишкеку Душанбе

Сафири Қирғизистон ба Душанбе меояд. Аммо рӯшан нест: мемонад ё намемонад

Урмат Саралаев, сафири Қирғизистон дар Тоҷикистон, ки дар пайи тирпаронии рӯзи 11 январ миёни марзбонҳои тоҷику қирғиз ба Бишкек фаро хонда шуда буд, қарор аст, 3 март ба Душанбе биёяд.

Вале то ҳоло маълум нест, Саралаев ба ҳайси сафир дар Тоҷикистон хоҳад монд ва ё дар танҳо дар музокироти навбатии Душанбею Бишкек иштирок карда, дубора ба ватанаш бармегардад. Чаро ки мақомоти Қирғизистон ҳангоми фаро хондани Саралаев гуфта буданд, то анҷоми таҳқиқи тирпаронии 11 январ Урмат Саралаев ба Тоҷикистон барнахоҳад гашт.

Мақомоти расмии Тоҷикистон мегӯянд, рӯзи 3 март дар Душанбе гуфтушуниди навбатии ҳайатҳои Тоҷикистону Қирғизистон барои ҳалли низои марзӣ ва мушаххас кардани хатти сарҳад баргузор хоҳад шуд. Ба қавли онҳо, дар ин ҷаласа Тоқон Мамитов, муовини нахуствазири Қирғизистон, ки ҳайати кишвараш дар музокирот бо Тоҷикистонро раҳбарӣ мекунад, низ иштирок хоҳад кард.

Тирпаронӣ миёни марзбонҳои тоҷику қирғиз зуҳри 11 январи соли ҷорӣ рух дода, дар пай аз ду ҷониб ҳашт захмӣ боқӣ гузошт. Вазорати умури хориҷии Тоҷикистон бо нашри изҳороте гуфта буд, тирпаронӣ бидуни кадом огоҳӣ нахуст аз тарафи марзбонҳои қирғиз оғоз ёфта, марзбонҳои тоҷик танҳо барои ҳифзи ҷонашон ба онҳо ҷавоб додаанд. Вале ҷониби Қирғизистон низ дар ин масъала кӯтоҳ наомада, ангушти иттиҳомашро болои марзбонҳои тоҷик дароз кард ва бо ирсоли се нота аз Вазоарти умури хориҷӣ хост, то ин қазияро шарҳ диҳад. Бишкек иддао дорад, ки тирпаронӣ аз сӯи марзбонҳои тоҷик оғоз шудааст ва ба ин далел марзашро яктарафа баста, сафирашро низ барои “машварат” боз хондааст.

Мӯҳр

Хабарҳои монанд: