13 мар 2014 12:16Хабарҳои ҷаҳон

Нигарониҳо аз қатли рӯзноманигорон дар арафаи интихоботи Афғонистон

Дидбони расонаҳои Афғонистон аз бад шудани вазъи рӯзноманигорон дар арафи интихоботи президентии ин кишвар сахт нигаронӣ кардааст.

Садиқуллоҳ Тавҳидӣ, раиси Дидбони расонаҳои Афғонистон гуфтааст, ҳукумати кишвараш нисбат ба амнияти хабарнигорон вақтҳои охир бетаваҷҷуҳӣ мекунад. Ӯ бар ин аст, ки агар ин раванд идома ёбад, рӯзноманигорони хориҷӣ аз иштирок дар раванди интихоботи раёсати ҷумҳури Афғонистон худдорӣ хоҳанд кард.

Ин нигарониҳо дар ҳолест, ки рӯзи 11 марти соли ҷорӣ дар шаҳри Кобул, пойтахти Афғонистон Нилс Хорнер, журналисти шведӣ мавриди ҳамлаи афроди мусаллаҳ қарор гирифта, дар роҳ ба беморхона ба ҳалокат расидааст. Муҳаммад Ҳасани Хаттоб, рӯзноманигори афғон бар ин аст, ки дар кишвараш “маъракае зидди рӯзноманигорон” роҳандозӣ шудааст. Ӯ мегӯяд, “кушта шудани як рӯзноманигор дар пойтахти Афғонистон, ки нисбатан макони амнтар маҳсуб мешавад, як занги хатар барои журналистон мебошад ва ин албатта дар шикастани рӯҳияи ин қишр бе таъсир нахоҳад буд.”

Дар ҳамин ҳол, расонаи хабарии Mir-Politik менависад, қатли рӯзноманигори шведиро гуруҳи Толибон бардӯш гирифтааст. Ба навиштаи ин расона, гӯиё ҳаракати Толибон бо пахши як баёния ин кушторро ба зимма гирифта, гуфтааст, Хорнер ба хотири ҳамкорияш бо Хадамоти ҷосусии Бритониё кушта шуд.

Расонаи Tolonews менависад, ки вақтҳои охир қатли рӯзноманигорон дар Афғонистон зиёд шудааст. Ба навиштаи он, танҳо дар давоми ду моҳи аввали соли ҷорӣ се рӯзноманигор кушта шудааст, ки ду нафари онҳо шаҳрвандони Афғонистон ва як тани дигараш хориҷӣ мебошад. Ин расона мегӯяд, дар баробари ин, қайди ҳолатҳои фишору таъқиб ва азияти рӯзноманигорон дар Афғонистон низ кам нестанд.

Дар акс Нилс Хорнер

Мӯҳр

Хабарҳои монанд: