03 апр 2014 17:12Оcиёи Марказӣ / Узбакистон

Ифшои ҷузъиёти "ҷосусӣ"-и се зан ба нафъи Тоҷикистон дар Узбакистон

Ахиран, иттилои бештаре дар мавриди парвандаи ҷиноӣ нисбат ба се зан дар Узбакистон, ки дар ҷосусӣ ба нафъи Тоҷикистон муттаҳам мешаванд, маълум гардид, хабар медиҳад 12news.uz.

Ба иттилои манбаъ, қазияи мазкур соли сипаришуда сару садоҳои зиёдеро ба бор овард, аммо на ҳама овозаҳо атрофи он дуруст будааст. Миёни мардум хабарҳо паҳн шуд, ки мақомот гуруҳи бузурге аз занҳоро бо иттиҳоми ҷосусӣ дастгир намудааст, аммо маълум шуд, ки танҳо се нафар боздошт гардидаанд. Онҳо худро танфурӯш ба намоиш дода, дар қаҳвахонаи шахсие фоҳишахона табдил додаву онҷо низомиён ва кормандони мақомоти ҳифзи ҳуқуқро меовардаанд.

12news.uz навишта, ки ин гуруҳ дар вилояти Сурхандарё ба ҷамъоварии маълумот дар бораи қисмҳои низомии дар қаламрави ин вилоят ҷойгирбуда, ҳарбиён ва аслиҳаи он машғул будааст.

“Ин ҷосусзанҳо ҳамчунин кормандони прокуратура ва шӯъбаи корҳои дохилии ноҳияҳои Сари Осиёву Узун, ҳамчунин шаҳрвандони Тоҷикистонро, ки солҳои ҷанги шаҳрвандӣ барои иқомати доимӣ ба ин минтақа омадаанд, ба фоҳишахона даъват мекардаанд. Бо талаби фармоишгарон аз Тоҷикистон онҳо маълумотҳоро ба таври хаттӣ ирсол мекардаанд. Ба ҷуз ин аксҳои ба воситаи телефони мобилӣ ва дастгоҳи суратгирӣ бардоштаи худро низ мефиристодаанд”,-меафзояд манбаъ.

Гуфта мешавад, маҳкумшудаҳо -- Хуршеда Бобоҷоноваю Нигора Қодирова шаҳрванди Узбакистон буда, Марҳамат Пулодова, табааи Тоҷикистон мебошад.

Додгоҳи вилоятии Сурхандарё моҳи июли соли 2013 ҳар кадом аз ин занҳоро барои 14 солӣ аз озодӣ маҳрум намуд.

“Аз мақомоти ҳифзи ҳуқуқи Сурхандарё ба мо гуфтанд, ки ҷониби Тоҷикистон талоши анҷоми фаъолиятҳои ҷосусиро дар қаламрави Узбакистон ҳануз ҳам хотима намедиҳад”,-навиштааст манбаъ.

Мӯҳр

Хабарҳои монанд: