17 апр 2014 16:19Тоҷикистон / Сиёсат

Амниятиҳои Чин дар ҷаласаи Душанбе хостаанд, то...

Дар ҷаласаи Шӯроҳои амнияти кишварҳои узви Созмони ҳамкории Шонгҳой пешниҳод шуд, то назорат аз болои созмонҳои ғайридавлатӣ ва шабакаҳои иҷтимоӣ бештар гардад. Ин ҷаласа рӯзи 17 апрел дар бӯстонсарои ҳукуматӣ дар Душанбе баргузор гардид.

Дар нишасти хабарӣ, ки баъд аз анҷоми ҳамоиш бо иштироки котиби Шӯрои амнияти Тоҷикистон Абдураҳим Қаҳҳоров сурат гирифт, аз ҷониби рӯзноманигорон чунин суол матраҳ шуд, “оё дар ҷаласа масъалаи бехатарии иттилоотӣ ва пешгирии киберҷиноятҳо ва диверсияи компютерӣ баррасӣ шуд, ё на?” Дар посух оқои Қаҳҳоров гуфт, “ин масъала низ ҳамчун ҷузъи амнияти минтақа дар маҷмӯъ мавриди баррасӣ қарор гирифт.”

“Кишварҳое чун Русия ва Хитой дар масъалаи бехатарии иттилоотӣ таҷрибаи хуб доранд. Аммо мо дар ин соҳа ҳанӯз роҳ барои рушд дорем. Ба мувофиқаи тарафайн, кадрҳои Тоҷикистон дар сохторҳои зирабти Русияву Чин омӯзиш хоҳанд дид”,-афзуд дабири Шӯрои амнияти Тоҷикистон.

Дар баробари ин, ҷониби Чин дар баромади худ пешниҳод кардаанд назорати созмонҳои ғайридавлатӣ ва шабакаҳои иҷтимоӣ бештар шавад, то аз хатарҳои имконпазири иттилоотӣ пешгирӣ гардад. “Айни ҳол нерӯҳои хориҷӣ аз мушкили иҷтимоию иқтисодии кишварҳои узви СҲШ барои сарнагун кардани ҳукуматҳо истифода бурда, кӯшиш мекунанд инқилобҳои рангаи навро роҳандозӣ намоянд, ки барои истиқлол ва амнияти мамолики узв хатар дорад. Бинобар ин, бояд барои пешгирии чунин воқеаҳо якҷоя кӯшиш ба харҷ диҳем ва чораҳои якҷоя андешем”, - омадааст дар баромади ҷониби ин.

Дар баромади ҷониби Чин аз се хатар, аз ҷумла қочоқи нашъа ва ҷинояти созмонёфтаи байналмилалӣ, ёдовар шуд. Агарчӣ дар матни баромад ду мушкил номбар шуд, аммо ҷаноби Қаҳҳоров гуфт, “имрӯзҳо мушкили ҷоруми мубрам низ пайдо шудааст, ки ин киберҷиноятҳо мебошанд.” Ҷониби Чин пешниҳод кардааст, ҳамкорӣ дар назорат ва идораи шабакаҳои иҷтимоӣ пурзӯр шуда, масъалаи ба роҳ мондани механизми мубориза бо ҷиноятҳои кибернетикӣ баррасӣ шавад, то се хатар имкон надошта бошанд, интернетро барои амалҳои харобкорӣ истифода баранд.

Дар варақаи иттилоотии ҷаласа омадааст, вазъи ноором, ки бо зиддиятҳои сиёсӣ, динию нажодӣ, иҷтимоию иқтисодӣ ва масоили дигар вобаста дар Шарқи наздик, шимоли Африқо ва сарзаминҳои ҳаммарз бо минтақаи СҲШ, ба амнияти ин минтақа ва ҷаҳон хатар эҷод мекунанд. Аммо, ба қавли Қаҳҳоров, ҳеч як аз ҷонибҳо масъалаи Украинаро барои баррасӣ дар ҳамоиш пешниҳод накардааст.

Мӯҳр

Хабарҳои монанд: