05 май 2014 13:50Тоҷикистон / Сиёсат

Имзои 9 санад миёни Душанбею Ашқобод, дар пайи мулоқоти Раҳмону Бердимуҳаммадов

Дар пайи мулоқоти Эмомалӣ Раҳмон, раисиҷумҳури Тоҷикистон, бо ҳамтои туркманаш Қурбонгулӣ Бердимуҳаммадов 9 санади нави ҳамкорӣ миёни Душанбею Ашқобод ба имзо расид.

Тибқи иттилои дафтари матбуоти раёсати ҷумҳури кишвар, рӯзи 5 май миёни ҳукумати Тоҷикистон ва Туркманистон созишнома дар бораи сохтмони бинои мактаби миёнаи таҳсилоти умумии ба номи Махдумқулӣ дар хоҷагии деҳқонии “Эргаш Султонов”-и ноҳияи Ҷилликӯли вилояти Хатлон ба имзо расидааст. Инчунин, миёни ҳукумати Тоҷикистон ва Туркманистон дар бораи рушди ҳамкорӣ дар соҳаи нақлиёт, сайёҳӣ созиш ҳосил шуда, як қатор барномаҳо, аз ҷумла барномаи ҳамкорӣ миёни Вазорати корҳои хориҷии Тоҷикистон ва Туркманистон барои соли 2015 қабул шудаанд.

Дар ин мулоқот ҷонибҳо Аҳдномаеро дар бораи ҳамкорӣ миёни Донишгоҳи миллии Тоҷикистон ва Донишгоҳи давлатии Туркманистон ба номи Махтумқулӣ ба имзо расониданд. Қурбонгулӣ Бердимуҳаммадов, раисиҷумҳури Туркманистон, субҳи 5 май бо як сафари расмӣ вориди Тоҷикистон шуд. Сафари ӯ ду рӯз идома ёфта, дар ин муддат бо Қоҳир Расулзода – нахуствазир ва Шукурҷон Зуҳуров, раиси Маҷлиси Намояндагон низ мулоқот хоҳад кард.

Муносибатҳои сиёсии Тоҷикистону Туркманистон баъд аз дарёфти истиқлолият, 27 январи соли 1993 бо имзои Протокол “Оид ба барқарор намудани муносибатҳои дипломатӣ байни Ҷумҳурии Тоҷикистон ва Туркманистон” оғоз шуд. Моҳи феврали соли 1995 дар Ашқобод сафорати Тоҷикистон ба кор шурӯъ кард. “Пояи қарордодиву ҳуқуқии муносибатҳои Тоҷикистону Туркманистон зиёда аз 50 санаде иборат мебошад, ки аз соли 1993 то соли 2012 ба имзо расидаанд. Созишномаҳои имзошуда асоси ҳамкориҳои дуҷонибаро дар соҳаҳои сиёсӣ, иқтисодӣ, фарҳангиву гуманитарӣ, сармоягузорӣ, андоз ва гумрук ташкил медиҳанд”,-омадааст дар иттилоияи Вазорати умури хориҷии Тоҷикистон.

Соли сипаришуда, гардиши савдои миёни ду кишвар 119,3 миллион долларро ташкил додааст. Дар доираи ҳамкориҳои иқтисодиву тиҷоратӣ, Тоҷикистон аз Туркманистон маҳсулоти нафтӣ, равғани поки пахта ва семент харидорӣ мекунад. Дар навбати худ, Туркманистон аз Тоҷикистон молҳои ниёзи мардум, алюминий ва маҳсулоти он, инчунин маҳсулоти кишоварзиро ворид мекунад.

Мӯҳр

Хабарҳои монанд: