08 май 2014 17:36Оcиёи Марказӣ / Тоҷикистон

Президент: “Тоҷикистон ҳамеша хостори сулҳ ва... ҳаёти осоишта мебошад”

Эмомалӣ Раҳмон, раисиҷумҳури Тоҷикистон, собиқадорони Ҷанги бузурги ватанӣ ва сокинони кишварро бо 69-умин солгарди пирӯзӣ бар фашизм табрик кардааст. Раисиҷумҳури Тоҷикистон ҷашни Рӯзи Ғалабаро рамзи садоқат ва ҳисси баланди ватандӯстӣ хонда, гуфтааст, он нишонаи шараф, ваҳдат ва рӯҳи устувору шикастнопазири халқҳои сулҳпарвару озодихоҳи олам мебошад.

“Дар замони муосир, ки хатарҳои экстремизму терроризм ва дигар ҷиноятҳои муташаккили фаромиллӣ фазои бисёр кишвару минтақаҳои ҷаҳонро ноором месозанд, сабақҳои талхи Ҷанги дуюми ҷаҳон моро ҳамеша ҳушдор медиҳанд, ки барои сулҳи пойдор ва таъмини зиндагии осуда ҳамеша ҳушёру омода бошем. Ман ҳангоми мулоқот бо роҳбарони кишварҳои гуногун ва суханрониҳоям аз минбарҳои баланди олам доим таъкид менамоям, ки Тоҷикистон ҳамеша хостори таъмини сулҳу субот, ҳаёти орому осоишта ва зиндагии ободу пурсаодати башарият мебошад”,-афзудааст ӯ.

Ба гуфтаи Эмомалӣ Раҳмон, ҷашни Рӯзи Ғалаба бо гузашти моҳу солҳо шукуҳу шаҳомат ва эҳтироми зиёд дар қалбҳо касб карда, ҳисси эҳтиром ва қадршиносии насли ҷавон нисбат ба собиқадорони ҷанг торафт бештар мегардад: “Иттиҳоду ягонагӣ, ҳамраъйӣ ва эҳсоси бузурги ҳамдастии халқҳои гуногуни ҷаҳон, сарфи назар аз ҷаҳонбинии сиёсӣ ва мансубияти диниву нажодии онҳо дар мубориза бар зидди фашизм саҳифаҳои дурахшонтарини Ҷанги дуюми ҷаҳон маҳсуб меёбанд.”

Оқои Раҳмон дар охир хотирнишон кардааст, “ки пос нигоҳ доштани хотираи қаҳрамонони майдони набард ва ба ҷо овардани эҳтироми собиқадорони ҷанг қарзи пурифтихори фарзандӣ ва рисолати шаҳрвандии ҳар яки мо мебошад.”

Мӯҳр

Хабарҳои монанд: