Даъвати муовини муфтӣ барои поин бурдани нархҳо дар Рамазон
Домулло Сайид Акбар, муовини муфтии Тоҷикистон, дар намози ҷумъа аз тоҷирону соҳибкорони кишвар даъват кард, дар арафаи моҳи шарифи Рамазон аз боло бурдани нархи молу колои худ худдорӣ кунанд. Ӯ рӯзи 20 июн дар Масҷиди марказии шаҳри Душанбе гуфт, “аз ҳамаи тоҷирон хоҳиш мекунем, нархҳоро дар арафаи моҳи Рамазон боло набаранду аз ин гуна амалҳо даст бардоранд”.
Муовини муфтии Тоҷикистон аз он ибрози таассуф кард, тайи солҳои охир бо омадани моҳи шарифи Рамазон нархи ғизо дар бозороҳои кишвар як баробар боло бурда мешавад: “Мо бояд дар фикри якдигар бошему вазъи ҳамдигарро дарк кунему дар рӯзҳои сахтӣ дастгирӣ кунем. Мутаассифона, бо сабабҳои ба мо номаълум агар имрӯз нархи чизе 5 сомонӣ бошад, бо омадани моҳи Рамазон он то 10 сомонӣ боло бурда мешавад.”
Домулло Сайид Акбар дар идома аз сокинони кишвар низ даъват кард, аз хайру садақаҳое, ки аз қудраташон берун асту боиси қарздор шудани онҳо мешавад, худдорӣ кунанд. Ӯ аз зиёдаравии бархе аз сокинон ҳангоми хайру садақа таассуф хӯрда, бо иқтибос аз суханони паёмбар (с) таъкид кард, ҳар нафаре кӯшиш мекунад, аз қудраташ зиёд хайр кунад, Худованд ин амали ӯро қабул нахоҳад кард. “Мардуми мо аҷиб одате доранд, ки дар ин моҳ талош мекунанд, ҳамаи чизи худро хайру садақа кунанд ё хӯрокҳои хубу дастархонҳо олӣ омода кунанд, ки боиси қарздор шудани бархе аз онҳо низ мешавад. Вале ин гуна хайрро Худованд ҳаргиз қабул намекунад”,-афзуд ӯ.
Моҳи шарифи Рамазон аз моҳҳои солшумории ҳиҷрии қамарӣ ба ҳисоб рафта, дар тақвими исломӣ баъд аз моҳи шаъбон ва қабл аз моҳи шаввол меояд. Мусулмонон дар ин моҳ рӯза гирифта, бештар ба ибодат ва қироати Қуръон машғул мешаванд. Бар асоси қарори Шӯрои уламои Маркази исломии Тоҷикистон имсол моҳи шарифи Рамазон дар Тоҷикистон субҳи 28 июн оғоз меёбад.
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |