Таъхири ҷавоби СМС-ҳо ва даъвои довталабон дар назди Маркази миллии тестӣ
Гурӯҳе аз довталабон аз натиҷаи озмуни тақсими ихтисосҳо ва дер расидани ҷавоби SMS-ашон аз сӯи Маркази миллии тестии назди раиси ҷумҳури Тоҷикистон норозигӣ карда, фаъолияти шаффофи ин ниҳодро зери суол бурданд. Даъвои гуруҳи довталабон рӯзи 15 августи соли ҷорӣ ҳангоми суҳбат бо масъулони Маркази миллии тестӣ садо дод.
Як масъули Маркази милли тестӣ баъд аз шунидани шикояти довталабе, ки мегуфт, ним соат боз аз ирсоли SMS хабаре нагирифтааст, гуфт: “Хоҳари азиз, мефаҳмам. Интизор шавед, ҳатман меояд. Мо ҳам ҷангҷол кардем, лекин онҳо мегӯянд, моро низ фаҳмед...”
Розия Табарова, масъули Маркази милии тестӣ, бо таъхир омадани ҷавоби SMS-ҳоро, ки бояд аз натиҷаи озмуни тақсими ихтисосҳо донишҷӯёнро огоҳ кунад, ба мушкили техникӣ рабт дод. Номбурда гуфт, айни ҳол кластерҳои 4 ва 5, яъне факултаҳои ҳуқуқшиносӣ ва тиббӣ пур шудаанд ва дар кластерҳои 1, 2, 3 мутаалиқ ба дигар ихтисосҳо ҷойҳо холӣ буда, интизори донишҷӯёнанд.
Қаблан Маркази миллии тестӣ, ки имсол масъулияти қабули довталабон ба донишгоҳҳои кишварро ба дӯш дорад, хабар дода буд, аз теъдоди умумии довталабони иштирокдошта 29 ҳазору 597 нафар холҳои гузариши фанниро аз рӯйи компонентҳои А ва Б ба даст оварданд. Сабзалӣ Ҷаъфаров, муовини аввали директори марказ дар суҳбат ба “Озодагон” ҷараёни имтиҳони довталабонро хуб арзёбӣ намуда, иброз дошта буд, довталабоне, ки холҳои гузаришро ба даст овардаанд, барои иштирок дар озмуни тақсимоти довталабон ба ихтисосҳои интихобнамудаашон, ба донишгоҳҳо роҳ дода мешаванд: “Дар сурати норозӣ будан аз натиҷаи имтиҳон довталаб ҳуқуқ дорад давоми 2 рӯз пас аз эълони натиҷаҳо аризаи худро ба комиссияи апелятсионии Маркази миллии тестӣ пешниҳод намояд.”
Бо вуҷуди шикоятҳо довталабоне низ ҳастанд, ки аз натиҷаи имтиҳони худ ва озмуни тақсими ихтисосҳо розиянд. Лола, як довталабе, ки ҳуҷҷатҳои худро ба Донишгоҳи техникии ба номи Муҳаммад Осимӣ супурдааст, мегӯяд, ба шаффофияти маркази миллии тестӣ бовар дорад: “Бо 371 бал ба Донишгоҳи техникӣ дохил шудам. Дар байни дӯстонам онҳое буданд, ки аз комиссия нагузаштанд”.
Мӯҳр
ТАҚВИМ
« Апрел 2024 » |
---|
Душ | Сеш | Чор | Пан | Ҷум | Шан | Якш |
---|
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | |