20 сен 2014 09:08Оcиёи Марказӣ / Тоҷикистон

Аз терори Бурҳониддин Раббонӣ се сол сипарӣ шуд

Се сол қабл дар ҳамин рӯз Бурҳониддин Раббонӣ, раиси ҷумҳури пешини Афғонистон ва раҳбари Шӯрои олии сулҳи ин кишвар дар пайи як амали терористӣ ба шаҳодат расид.

Бурҳониддин Раббонӣ 20 сентябри соли 2011 дар манзили зисташ аз сӯйи ду нафаре, ки худро намояндаи “Толибон” номида ва барои гуфтушунид омада буданд, кушта шуд. Раббонӣ яке тоҷикони сернуфуз ва муборизи роҳи сулҳу озодӣ дар Афғонистон буд, ки соли 1940 дар Файзободи Бадахшон ба дунё омадааст. Соли 1963 дараҷаи профессори Донишгоҳи Кобулро дар риштаи ҳуқуқи ислом ва фиқҳ ба даст овард ва дар риштаи фалсафаи ислом Донишгоҳи Ал-Азҳари Мисрро хатм кард.

Баъд аз табаддулоти Довудшоҳ дар соли 1973 ба Пешовари Покистон ҳиҷрат намуда, дар набардҳои мусаллаҳонаи ҷанги Афғонистон алайҳи Шӯравӣ дар солҳои 1979-1989 саҳми намоёне дошт. Ӯ моҳи майи соли 1992 ба Кобул баргашт ва бар асоси Созишномаи Пешовар раёсати ҳукумати мувақатии Афғонистонро ба дӯш гирифт. Дар декабри соли 1992 президенти Афғонистон интихоб шуд ва ин масъулиятро то декабри соли 2001, ки аз мақоми президентии Афғонистон истефоъ дод, бар дӯш дошт. Аз соли 1996 ба таври расмӣ яке аз пешвоҳои Иттиҳоди Шимол (нерӯҳои муқовиматӣ, ки алайҳи Толибон мубориза мебурданд) буд.

Соли 2010 ба симмати раиси Шӯрои олии сулҳи Афғонистон интихоб шуда ва то дами марг ин мақомро дошт. Замоне, ки Тоҷикистон дар оғуши нобасомониҳои сиёсӣ қарор дошт, бештар аз 150 ҳазор фирории тоҷикро бо паноҳгоҳ таъмин кард. Таъсири Раббонӣ ва Аҳмадшоҳи Масъуд дар музокироти сулҳи тоҷикон, махсусан барои ташкили мулоқоти Хустдеҳ, ки давраҳои ҳассос ва ҳалкунандаи сулҳи тоҷикон буд, асосӣ ҳисоб мешавад.

Моро ҳамроҳӣ кунед:
Дар ФЕЙСБУК (FACEBOOK)
Дар ЮТЮБ (YOUTUBE)

Мӯҳр

Хабарҳои монанд: