03 окт 2014 15:25Тоҷикистон / Иҷтимоӣ

Кабирӣ: Иди Қурбон як озмоиши гузаштан аз манофеи шахсию гуруҳист

Муҳиддин Кабирӣ, раиси Ҳизби наҳзати исломӣ ва вакили парлумони Тоҷикистон бо нашри як паём сокинони кишвар ва мусалмонони ҷаҳонро бо Иди Қурбон, яке аз ду иди бузурги пайравони дини мубини Ислом табрик гуфтааст.

Дар ин паёми раиси ҲНИТ, аз ҷумла омадааст, “фарорасии Иди Қурбонро ба якояки Шумо табрик гуфта, аз Худованди маннон бароятон умри дароз, тани сиҳату зиндагии осуда ва барои кишвари азизамон сулҳу оромӣ ва ояндаи дурахшон орзумандам”.

Муҳиддин Кабирӣ дар идома таъид кардааст, Иди Қурбон танҳо як рӯзи шодию хурсандӣ набуда, балки як фурсате барои озмудани худ ва шинохти воқеии хеш аст: “фурсатест, то ҳар инсони муъмин бо пайравӣ аз Ҳазрати Иброҳим (а) худро бисанҷад, ки оё омода ҳаст то ба хотири арзишҳо ва ҳадафҳои болотари муштарак аз баҳри хостаҳо ва ормонҳои шахсиву гуруҳаш бигзарад ё не. Ҳазрати Иброҳим дар баробари имтиҳони сабр, худгузаштагӣ, итоат аз амри Парвардигор ва устуворӣ қарор гирифт ва танҳо пас аз муваффақ гаштан ин рӯз ид дониста шуд”.

Раиси ҲНИТ арзиши сулҳу субот ва ваҳдату оромии кишварро барои миллати тоҷик бештар аз дигар чизҳо хонда, таъкид кардааст, ки ҳеч кас набояд хостаҳои худро болотар аз ин арзиш донад. “Ҳадафе болотар аз ризои Худованд, озодиву каромати бандагони Ӯ, итоат аз амру фармонҳояш нест ва вазифаи ҳар инсон саъй барои расидан ба ин ҳадафҳост, ки танҳо дар партави арзишҳои боло зикршуда анҷом хоҳад гашт. Имрӯз, ки мусалмонон дар он барои ризоияти Худованд аз моли ҳалолашон қурбонӣ мекунанд ва ба дигарон мебахшанд, намоде аз боло гузоштани ризои Худованд, манфиатҳои мардум ва миллат бар манофеъи шахсӣ аст”,-омадааст дар паёми табрикии райиси ҲНИТ.

Моро ҳамроҳӣ кунед:
Дар ФЕЙСБУК (FACEBOOK)
Дар ЮТЮБ (YOUTUBE)

Мӯҳр

Хабарҳои монанд: