Даргузашти як роҳбалади зоирони тоҷик дар Арабистон
Шоми 7 октябри соли равон Олимхуҷа Раҳимов, роҳбалад ба ҳоҷиёни ноҳияи Файзобод, бо далели хуруҷи бемории қанд аз олам даргузашт.
Афшини Муқим, котиби матбуотии Кумита оид ба корҳои дин, танзими анъана ва ҷашну маросимҳои миллии Тоҷикистон ба "Озодагон" гуфт, марҳум, ки қаблан аз ин беморӣ ранҷ мебурд, маризиаш баъди адои маносики ҳаҷ дубора хуруҷ намуд ва боиси ба ҳолати беҳушӣ (кома) гирифтор шудани ӯ гардид. Ҷанозаи марҳум субҳи имрӯз, 8 октябр баъди адои намози бомдод дар масҷид-ул-ҳаром баргузор гардид ва ҷасади ӯро дар оромгоҳи "Шароеъ", воқеъ дар назди ҳарам ба хок супориданд.
"Марҳум Олимхуҷа Раҳимов аз иҷрои уҳдадориҳои худ ба сифати роҳбалад дар ин мавсим сарбаландона ва бо муваффақият баромад ва зоирине, ки зери раҳбаладии ӯ маносики ҳаҷро адо намуданд, бо изҳори андуҳ аз марги бемаҳал марҳумро ба некӣ ёд мекунанд. Роҳбарият ва аҳли кормандони Кумитаи оид ба корҳои дин, танзими анъана ва ҷашну маросимҳои миллии назди Ҳукумати Ҷумҳурии Тоҷикистон, инчунин ҳайати ситоди "Ҳаҷ - 2014" ба наздикони марҳум амиқан изҳори тасаллият намуда, ба марҳум раҳмату мағфирати Парвардигор ва ба фарзандону пайвандон сабри ҷамил хоҳонанд",-афзуд номбурда.
Қаблан, яке аз зоирони тоҷик ба далели бад шудани вазъи саломатияш пеш аз оғози мавсими Ҳаҷ ба Ватан бозпас фиристода шуд. Кумитаи дин гуфт, Аҳад Аюбов, сокини 78-солаи ноҳияи Исфараро шоми 23 сентябри соли равон бо дархости наздиконаш ба Ватан фиристодааст.
Ҳаҷ аз ҷумлаи аркони панҷгонаи дини мубини Ислом аст, ки барои ҳар мусалмони ба балоғатрасида ва тавоно фарз мебошад. Ҳамасола аз Тоҷикистон ҳудуди шаш ҳазор барои зиёрати Хонаи Худо ба Макка мераванд. Ба иттилои Кумитаи дин, имсол беш аз 6 ҳазор сокини Тоҷикистон барои адои Ҳаҷ ба Арабистони Саудӣ сафар кардаанд ва интизор меравад, нахустин гуруҳи ҳоҷҷиёни тоҷик аз Арабистони Саудӣ рӯзи 9 октябр ба ватан баргарданд. Моро ҳамроҳӣ кунед:
Дар ФЕЙСБУК (FACEBOOK)
Дар ЮТЮБ (YOUTUBE)
Мӯҳр
ТАҚВИМ
« Май 2024 » |
---|
Душ | Сеш | Чор | Пан | Ҷум | Шан | Якш |
---|
| 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | |