09 окт 2014 10:28Тоҷикистон / Сиёсат

Иштироки президент дар тӯйи афсарони таъиноти махсус

Эмомалӣ Раҳмон, райиси ҷумҳури Тоҷикистон аснои боздид аз ноҳияи Бохтар ба қароргоҳи дастаи таъиноти махсуси милисаи Раёсати умури дохилии вилияти Хатлон рафта бо буридани лента бинои нави онро мавриди баҳрабардорӣ қарор дод.

Тавре дафтари матбуотии президенти кишвар менависад, дар саҳни ҳавлии қароргоҳи ин воҳиди махсуси милиса Эмомалӣ Раҳмон нахуст дар тӯйи арӯсӣ ва хатнасури дастаҷамъонаи фарзандони кормандони ин соҳа иштирок намуд: “Дар ин ҷо тӯйи арусии 8 духтари ҷавон аз оилаҳои ниёзманд ва 8 афсари воҳиди махсуси милиса ва ҳамчунин хатнасури 22 писарча аз оилаҳои кормандони соҳа ороста шуд”.

Ба иттилои манбаъ, райисиҷумҳур дар ин маросим ба ҳамаи навхонадорон асбобу ашёи арзишманди рӯзгор ва ба писарбачаҳо туҳфаҳои хотиравӣ тақдим намуд. “Зимни боздиди сарвари давлат Эмомалӣ Раҳмон аз ошхона, анбори нигоҳдории молу маҳсулот иттилоъ дода шуд, ки барои таъмини хизматчиёни дастаи таъиноти махсуси милиса бо маводи ғизоӣ шароити зарурӣ фароҳам оварда шудааст. Дар ҳудуди қароргоҳи даста майдончаҳои машқу тамрин бунёд ёфтаанд, ки дар баланд бардоштани маҳорати ҷангии хизматчиёни ин даста нақши асосӣ доранд. Дастаи таъиноти махсуси милиса барои иҷрои вазифаҳои пурмасъулияти худ бо аспҳои савории ба таври хоса омодашуда, сагҳои хизматии омӯзишдида ва бо техникаву лавозимоти гуногуни ҳарбӣ таъмин карда шудааст”.

Эмомалӣ Раҳмон инчунин дар ноҳияи Бохтар дар расми ба истифода дода шудани мактаби таҳсилоти миёнаи умумии №12 дар ҷамоати Меҳнатобод ширкат намуд. Иттилоъ дода шуд, ки ин муассисаи таълимӣ бо маблағгузории муштараки Фонди Саудии Рушд ва Ҳукумати Тоҷикистон бо арзиши умумии қариб 14 миллион сомонӣ сохта шудааст. “Мактаби мазкур барои бо таҳсил фаро гирифтани қариб 2400 нафар хонанда дар ду баст пешбинӣ шуда, аз 4 бинои таълимӣ, 40 синфхонаи муҷаҳҳаз бо лавозимоти муосири хониш, 10 озмоишгоҳи фаннӣ, маҷлисгоҳ, толору майдони варзишӣ ва дигар иншооти ёрирасон иборат мебошад”,-хабар медиҳад дафтари матбуотии президенти Тоҷикистон.

Моро ҳамроҳӣ кунед:
Дар ФЕЙСБУК (FACEBOOK)
Дар ЮТЮБ (YOUTUBE)

Мӯҳр

Хабарҳои монанд: